2024 është viti i dytë që do të zbatohet reforma e pagave që ka ndërmarrë qeveria për ta bërë pagën mesatare në 900 euro. Ministri i Financave Ervin Mete gjatë intervistës për emisionin E-ZONE në Vizon Plus shpjegoi se përfitues nga vera e këtij viti do të jenë kategoritë më të rëndësishme, një pjesë e pozicioneve në pushtetin lokal dhe specialistët.
“Përfitues do të jenë punonjësit e policisë, arsimit, shëndetësisë, mbrojtjes. Ata që kanë përfituar një vit më parë rritjen e plotë, këtë vit nuk do të përfitojnë më. Por disa funksione si specialistët që një vit më parë nuk kanë përfituar apo kanë përfituar rritje page prej 7%, këtë vit do të vijojnë me rritje page 20- 30% në varësi të pozicionit. Rritja mesatare e pagave gjatë këtij viti varion nga 10-30%”, tha ministri
Ministri sqaroi edhe nëse do të rriten pagat e ministrave, deputetëve apo funksionarëve të lartë.
“Këtë vit ministrat, deputetet, funksionarët e lartë nuk do të kenë më rritje page. Rritjen e përfituan një vit më parë”, sqaroi ministri Mete
Paralelisht pritet të indeksohen dhe pensionet. Masa e indeksimit do të përcaktohet, pasi INSTAT të kalkulojë inflacionin e shportës së pensionistëve. Por këtë vit pritet të ketë dhe një paketë të re mbështetëse.
“Kemi buxhetuar indeksimin, kemi buxhetuar edhe shpërblimin e fundvitit, por në varësi edhe të të ardhurave, të cilat deri tani kanë patur një ecuri të mirë, ne po konsiderojmë që deri në fund të vitit të kemi një paketë të re për shtresat në nevojë”, tha ministri për E-ZONE
Ndërsa në fund të vitit do të shpërndahet edhe bonusi vjetor, i cili pritet të jetë në masën 5 mijë lekë. /vizionplus.tv
