Mëngjesin e kësaj të diele mbrojtja ajrore ruse ka rrëzuar të paktën 142 dronë, ndërsa forcat ukrainase kanë intensifikuar sulmet drejt Moskës.
Ende nuk ka informacion të detajuar në lidhje me viktimat apo dëmet që këto sulme kanë shkaktuar.
Ministria ruse e Mbrojtjes njoftoi se të paktën 27 dronë janë rrëzuar mbi rajonin e kryeqytetit, ndërkohë që rreth dhjetë rajone të tjera, përfshirë Brijanskun dhe Kurskun, dy zona pranë kufirit me Ukrainën janë goditur me sulme të përsëritura. Për shkak të tyre, fluturimet në katër aeroporte kryesore të Moskës janë ndërprerë përkohësisht.
Ky hap vjen vetëm një ditë pas një sulmi të ngjashëm nga Ukraina, që po ashtu përdori dronë. Në përgjigje, forcat ruse lëshuan qindra dronë dhe raketa ndaj qyteteve ukrainase.
Presidenti i Ukrainës, Volodymir Zelensky i kërkoi Rusisë një raund të ri bisedimesh.
“Ritmi i negociatave duhet të përshpejtohet. Duhet bërë gjithçka për të arritur një armëpushim. Dhe pala ruse duhet të ndalojë së fshehuri vendimet. Shkëmbime të të burgosurve. Kthim i fëmijëve. Fundi i vrasjeve. Dhe një takim në nivelin e udhëheqësve është i nevojshëm për të siguruar vërtet paqen një paqe vërtet të qëndrueshme. Ukraina është gati për një takim të tillë”, tha Zelensky.
Ukraina, që prej nisjes së luftës nga Rusia në vitin 2022, vazhdon të synojë shkatërrimin e linjave të furnizimit ushtarak të armikut përmes sulmeve intensive në rajonet kufitare, duke rritur kështu presionin mbi Moskën.
