Rubio merr udhëheqjen e USAID: Fondet duhet të jenë në linjë me politikën e jashtme amerikane
Sekretari i Shtetit i SHBA-së, Marco Rubio, ka zbuluar se ai ka marrë detyrën e drejtorit të përkohshëm të Agjencisë së Shteteve të Bashkuara për Zhvillim Ndërkombëtar (USAID), byro e përhapur qeveritare e ngarkuar me ofrimin e ndihmës humanitare në të gjithë botën.
Duke folur nga El Salvador të hënën, Rubio e përshkroi USAID-in si një “agjenci krejtësisht të papërgjegjshme”.
“E kam thënë shumë qartë gjatë seancave dëgjimore për konfirmimin tim se çdo dollar që shpenzojmë, çdo program që financojmë, do të jetë në linjë me interesat kombëtare të SHBA-së. USAID-i ka një histori të injorimit të kësaj dhe është parë disi si një organizatë bamirëse globale, e ndarë nga interesat kombëtare. Këto janë para të taksapaguesve”, tha Rubio.
Ai gjithashtu akuzoi zyrtarët e saj për “mosbindje” për dështimin për t’iu përgjigjur pyetjeve në lidhje me shpenzimet dhe prioritetet e administratës së Presidentit Donald Trump.
“Në shumë raste, USAID-i është i përfshirë në programe që bien ndesh me atë që ne po përpiqemi të bëjmë me strategjinë tonë kombëtare,” tha Rubio.
“Kanë kaluar 20 ose 30 vjet që njerëzit janë përpjekur ta reformojnë atë.”
Një zyrtar i lartë i Shtëpisë së Bardhë i tha gjithashtu agjencisë së lajmeve Reuters se Trump po konsideronte shkrirjen e agjencisë me Departamentin e Shtetit për të “ulur ndjeshëm madhësinë e fuqisë punëtore për qëllime efikasiteti dhe për të siguruar që shpenzimet e tyre të jenë në përputhje me axhendën e presidentit”.
Zyrat qendrore të agjencisë mbyllën dyert këtë të hënë pasi miliarderi Elon Musk njoftoi se Presidenti Trump ka rënë dakort për ta mbyllur USAID-in.
Musk i cili ka marrë miratimin e presidentit për të nisur një process të jashtëzakonshëm të rishikimit të qeverisë federale, tha se agjencia që ka menaxhuar prej gjashtë dekadash programet amerikane të ndihmës dhe zhvillimit në të gjithë botën, do të ndalojë së funksionuari.
Agjencia shpërndan miliarda dollarë çdo vit në mbarë botën përfshirë edhe Shqipërinë për të ndihmuar në zbutjen e varfërisë, ndërtimin e demokracisë dhe zhvillimin.
