Gjatë fjalimit në Konferencën e Sigurisë së Munihut, Sekretari Amerikan i Shtetit, Marco Rubio, tha se SHBA-ja dhe Evropa duhet të jenë së bashku.
“Amerika po udhëheq rrugën për një shekull të ri të prosperitetit dhe ne duam që këtë ta bëjmë së bashku me ju, aleatët tanë të çmuar dhe miqtë tanë më të vjetër”.
Duke iu përgjigjur shqetësimeve për një divorc të mundshëm transatlantik, sekretari Rubio tha se ky nuk është qëllimi i vendit të tij.
“Ne nuk kemi nevojë të zhbëjmë institucionet globale të rendit të vjetër që kemi ndërtuar së bashku. Por, ato duhet të reformohen”.
Kryediplomati amerikan theksoi se, edhe kur lindin mosmarrëveshje, ato burojnë nga një shqetësim i thellë për Evropën, jo vetëm nga perspektiva ekonomike apo ushtarake.
“Ne jemi të lidhur shpirtërisht dhe kulturalisht. Dëshirojmë që Evropa të jetë e fortë. Besojmë se Evropa duhet të mbijetojë… fati ynë gjithmonë do të jetë i lidhur me tuajin. Ne duam aleatë që mund të mbrojnë veten e tyre, në mënyrë që asnjë kundërshtar të mos ndiejë tundimin të sfidojë forcën tonë kolektive.”
Ndërkohë në fjalën e saj presidentja e Komisionit Evropian Ursula von der Leyen e vuri theksin te pavarësia e unionit.
“Sot është koha për veprim dhe dua të përqendrohem në planin e Evropës për pavarësi. Për të ndihmuar në hartimin e kësaj, do të huazoj një frazë nga Jerry Friedheim, Ndihmës Sekretari i Mbrojtjes i SHBA-së të thënë këtu në Mynih në vitet ’70: “Nëse një komb nuk e ndien veten kryesisht përgjegjës për sigurinë dhe mirëqenien e vet, ai do t’ia lërë detyrën të tjerëve dhe do të dështojë në mobilizimin e burimeve dhe vullnetit të tij politik në mbrojtjen e vet”. E zgjodha këtë frazë sepse pasqyron disa të vërteta të pakëndshme gjatë shumë dekadave. Rreth asaj se si siguria e Evropës nuk është parë gjithmonë si përgjegjësia jonë kryesore. Deri në vitin 2028, investimet në mbrojtje në Evropë parashikohet të tejkalojnë shumën që SHBA-të shpenzuan për pajisje të tilla vitin e kaluar. Ky është një zgjim i vërtetë evropian.”
Ndërkohë kryeministri britanik Keir Starmer paralajmëroi se udhëheqësit duhet të jenë të vetëdijshëm për “shenjat paralajmëruese” nga Rusia dhe të përgatiten për atë që mund të ndodhë në të ardhmen.
