Nga Mimoza Ibra
Viti 2024 shënoi një numër rekord të importit të mjeteve elektrike në Shqipëri. Të dhënat e Drejtorisë së Përgjithshme të Transportit Rrugor tregojnë se rreth 17% e mjeteve të regjistruara për herë të parë në Shqipëri i përkasin kësaj kategorie.
“E tërë flota e mjeteve elektrike, që përfshin all elektrik dhe hibride është në shifrat e 12.424 mjeteve në 2024. Kjo shifër është 76% më shumë se 2023. Nëse i referohemi vetëm mjeteve elektrike, shifrat kanë arritur në 6.378 mjete, ose 92% më shumë se 2023. Muaji tetor ka qenë rekord për regjistrimin e mjeteve elektrike, me 355 të tilla”, tha Arben Progni, drejtor i regjistrimit të mjeteve në DPSHTRR.
Flota e mjeteve që qarkullojnë në vend është e rinovuar, pasi një pjesë e mirë e mjeteve të regjistruara për herë të parë gjatë 2024 i përkasin gjeneratës së fundit.
“Deri në dhjetor të 2024 ka pasur 99.441 regjistrime, nëse i referohemi një viti më parë, kemi 27% regjistrime më shumë. Mjetet që janë importuar gjatë 2024 janë mjete me një vjetërsi mesatarisht 10-vjeçare. 17 mijë mjete të importuara janë të gjeneratës së re, 0-3 vite. Ndërsa mjetet me vjetërsi 9-15 vjeçare, përbëjnë rreth 53% të tregut. Mjetet e kategorisë mjedisore Euro5 dhe mbi Euro5 në vitin e fundit përbëjnë mbi 65% të regjistrimeve”, shtoi Progni.
Referuar statistikave, vitin e kaluar u çregjistruan në mënyrë të përhershme 8 mijë mjete, të cilat ishin me moshë mbi 22-vjeçare./vizionplus.tv
