Lufta mes bandave kriminale në Suedi po përshkallëzohet dhe po merr përmasa gjithnjë e më shqetësuese. Përveç trafikimit ndërkombëtar të drogave të forta si kokaina, rrjetet kriminale po përdorin një taktikë gjithnjë e më të shpeshtë: rekrutimin e fëmijëve për të kryer sulme të dhunshme, përfshirë edhe vrasje me porosi.
Një hetim i Al Jazeera tregon se bandat po shfrytëzojnë faktin që trajtimi penal për të miturit në Suedi është më i butë. Sipas një raporti policor të vitit 2023, rreth 1,700 persona nën moshën 18 vjeç ishin aktivë në rrjete kriminale, ndërsa autoritetet besojnë se ky numër është rritur më tej.
Vetëm nga janari deri në gusht të këtij viti, policia suedeze arrestoi 66 fëmijë të moshës 13–14 vjeç, krahasuar me 27 gjatë së njëjtës periudhë të vitit të kaluar. Tendencat e fundit tregojnë se rekrutimi nuk kufizohet më vetëm në lagje të varfra, por prek fëmijë nga të gjitha shtresat shoqërore.
Suedia, me 10.6 milionë banorë, renditet tashmë ndër vendet me nivelet më të larta të dhunës vdekjeprurëse me armë në Evropë, kryesisht të lidhura me bandat. Sulmet me granata – shpesh të kontrabanduara nga Ballkani – janë bërë një mjet i zakonshëm frikësimi, pasi shpesh nuk klasifikohen si tentativë vrasjeje dhe sjellin dënime më të lehta.
Autoritetet theksojnë se përdorimi i të miturve e vështirëson ndjeshëm hetimin, pasi procedurat ligjore janë më të kufizuara dhe fëmijët lënë më pak gjurmë financiare apo administrative. Kjo e bën më të vështirë identifikimin e udhëheqësve të rritur që qëndrojnë pas sulmeve./vizionplus.tv
