Kullat karakteristike të Veriut do të rijetëzohen për t’u vënë në shërbim të turizmit kulturor dhe historik.
Projekti më i fundit i Ministrisë së Kulturës, Turizmit dhe Sporteve, i mbështetur nga fondet e qeverisë gjermane, synon identifikimin, restaurimin dhe funksionalizimin e këtyre objekteve me vlera të veçanta arkitekturore.
Takimi i radhës u zhvillua në Bashkinë e Malësisë së Madhe, me pjesëmarrjen e banorëve që i kanë ruajtur kullat ndër vite.
Drejtori i Trashëgimisë Kulturore Shkodër, Helidon Sokoli, bëri të ditur se vetëm në rajonin Shkodër–Mirditë–Kukës janë identifikuar mbi 200 kulla dhe procesi i evidentimit vijon.
Sipas tij, pas përfundimit të kësaj faze do të nisë financimi për rijetëzimin dhe rikthimin në funksion të këtyre ndërtesave tradicionale.
Banorët e pranishëm e mirëpritën projektin, duke theksuar se përveç ndikimit në zhvillimin e turizmit, ai kontribuon drejtpërdrejt në ruajtjen e identitetit ndërtimor shqiptar, veçanërisht të zonave veriore.
Në emër të Bashkisë së Malësisë së Madhe, kryetari Tonin Marinaj garantoi angazhimin për pajisjen e kullave me dokumentacion të rregullt pronësie, duke i konsideruar ato pasuri me rëndësi kombëtare./vizionplus.tv
