Prokuroria e Posaçme kërkon të vërë në bankën e të akuzuarve 27 të pandehur për krime shumë të rënda.
Mes tyre bën pjesë ish-deputeti socialist Arben Ndoka, në rolin e krijuesit dhe organizuesit të një grupi kriminal që në shënjestër kishte vrasjen e dy vëllezërve Durim dhe Valter Bami.
SPAK ka arritur të zbardhë se në fakt ish-deputeti ka bashkëpunuar me disa krerë grupesh të tjerë, siç ishte edhe i shumëkërkuari, njëherësh i shpallur i zhdukur, Ervis Martinaj. Ky i fundit kërkonte të ekzekutimin e vëllezërve, ç’ka bëri që mes tyre të lindtte një aleancë e që përfundoi me plagosjen e Durim Bamit.
Megjithatë nga ana e tij, i ashtuquajturi, bosi i lojërave të fatit, Ervis Martinaj rezulton si krijues dhe financues e një tjetër grupi kriminal për të siguruar kushtet që të vrasë edhe 5 persona të tjerë. Mes tyre bën pjesë edhe aleati i tij i dikurshëm Leonard Duka.
“Janë organizuar prej qershorit 2020 për vrasjen e shtetasit, Durim Bami, për shkak të konflikteve që Ervis Martinaj dhe Tori Xhecuka kishin me këtë shtetas. Më datë 4.11.2020, anëtarët e këtij grupi të strukturuar kriminal kanë tentuar të vrasin me armë zjarri pa leje, shtetasit Durim Bami dhe Ervin Kodra në vendin e quajtur Ura e Tapizës, Fushë Krujë. Ata po udhëtonin me një autoveturë Range Rover, ngjyrë e zezë me targa italiane, ndërsa pasagjer ka qenë djali i hallës së tij, Ervin Kodra”, thotë SPAK.
Në njoftimin e gjatë të prokurorisë së posaçme vihet re përplasja e dhunshme e secilit grup në asgjësimin e tjetrit.
Edhe Durim Bami është pjesë e listës së personave ndaj të cilëve SPAK kërkon gjykimin. Nga ana e tij, edhe ai drejtues i një tjetër grupi kriminal akuzohet se ka kërkuar të vrasë pikërisht ish- ligjvënësin socialist, Arben Ndoka dhe dy persona të tjerë, ushtarë të Ervis Martinajt. Bami ka bashkëpunuar me Endrit Doklen për të kryer vrasjet, ndërsa për të trafikuar drogë ka pasur bashkëpunëtorë nga radhët e policisë së shtetit.
“I pandehuri Durim Bami ka organizuar, drejtuar dhe financuar një grup të strukturuar kriminal, të destinuar në kultivimin e bimëve narkotike kanabis sativa, në fshatin Nikël, Fushë-Krujë gjatë periudhës kohore, dhjetor 2019-korrik 2020, si dhe në zonën e Njësisë Administrative Bubq, të Bashkisë Krujë, si para ashtu dhe gjatë muajit shtator 2020, duke u kujdesur për mbarëvajtjen e këtij aktiviteti. Ai ndihmohej në veprimet e tij të kundraligjshme nga punonjës të policisë së shtetit, si i pandehuri Altin Morina dhe shtetas të tjerë ende të paidentifikuar, të cilët jepnin informacione, apo ndihmonin në shmangien e kontrolleve të parcelave të mbjella me bimë narkotike”, njofton SPAK.
Por jo vetëm kaq, janë vënë nën akuzë edhe ish drejtori i policisë së Lezhës, Henrigert Mitri dhe Klodian Shahini, shefi i seksionit që lufton narkotikët.
“Gjithashtu, provohet se në zonën e Qarkut të Lezhës, si dhe në zonën e Krujës gjatë muajve maj-shtator 2020, ka ushtruar veprimtari të kundraligjshme në kultivimin e kanabis sativa një grup i strukturuar kriminal, i drejtuar nga një shtetas i paidentifikuar. Në këtë veprimtari janë përfshirë shtetasit:
*Klodian Shahini, punonjës policie me detyrë Shef i Sektorit të Luftës Kundër Narkotikëve në Drejtorinë e Policisë Lezhë
*Henerigert Mitri me detyrë Drejtori i Drejtorisë Vendore të Policisë Lezhë
Ata, duke përdorur detyrën kanë favorizuar kultivimin e kanabisit dhe i kanë dhënë informacione të brendshme policore drejtuesit të grupit si dhe kanë ndihmuar në shmangien e kontrolleve policiore në parcelat ku kultivohej lënda narkotike. I përfshirë në këtë aktivitet të kundraligjshëm në rolin e bashkëpunëtorit ka qenë dhe i pandehuri Elton Zalla. Në banesën e këtij të fundit, më 20.9.2020 u gjetën 202 kg lëndë narkotike kanabis sativa, në proces tharjeje, përpunimi dhe ambalazhimi.
Me cilësinë e Drejtorit Policisë në Drejtorinë Vendore të Policisë Lezhë, gjatë periudhës kohore janar-shtator 2020, Henerigert Mitri duke komunikuar me përdorues të ndryshëm të aplikacionit ScyECC, me dashje, nuk ka ushtruar detyrat e tij funksionale duke lejuar ushtrimin e lojërave të fatit në kundershtim me ligjin”, thotë SPAK.
