Në Delvinë situata e zjarrit vijon të jetë problematike. Sipas Ministrisë së Mbrojtjes, gjendja është rënduar sepse flakët kanë depërtuar në lagjen Kasapaj, në banesa.
Banorët e lagjes Kasapaj në Delvinë janë evakuuar plotësisht. Zjarri rrezikoi edhe sot puset e gazit në këtë lagje, por efektivët e ushtrisë po e mbajnë nën kontroll situatën. Forcat zjarrfikëse e kanë përqëndruar punën në Kasapaj për të vendosur nën kontroll flakët, ndërsa në orët e pasdites ndërhyri nga ajri një avion Canadair i dërguar nga Italia.
Po ashtu, zjarri po zhvendoset edhe drejt Gjirokastrës. Lazarati është fshati më i rrezikuar për momentin. Forcat zjarrfikëse të Gjirokastrës kanë nisur operacionin për shuarjen e zjarrit bashkë me disa banorë të fshatit. Situata vlerësohet si kritike dhe nuk dihet deri në cilën zonë do të arrijnë flakët.
Në operacion për vendosjen nën kontroll të zjarreve po marrin pjesë edhe 2 helikopterë çek dhe sllovak në ndihmë të forcave tokësore.
Vatra zjarri ka edhe në fshatin Tremul, njësia administrative Aliko, bashkia Finiq, ku situata është e rënduar pasi rrezikohen banesat. Në terren ndodhen 2 mjete zjarrfikëse që po punojnë për shuarjen e flakëve.
Zjarri vijon aktiv edhe në Dhivër të Finiqit, mbi Syrin e Kaltër. Edhe në fshatin Bistricë ka prezencë të flakëve në lartësi të malit, por për momentin nuk ka rrezik për banesat.
Banorët e Delvinës u përballën me një situatë jashtëzakonisht të vështirë gjatë natës duke u gdhirë e mërkura, teksa flakët, të shtyra nga era u përhapejn me shpejtësi duke rrethuar brenda pak orësh qytetin.
Pamjet apokaliptike bënë që familje të tëra të përfshihen nga paniku, ndërsa autoritetet u detyruan të evakuojnë lagjet e rrezikuara.
Banorët e Delvinës janë detyruar të kalojnë natën në qiell të hapur, teksa pohojnë se dëmet kanë qenë të mëdha edhe në tokat bujqësore.
Rreth 10 persona, mes tyre 4 ushtarakë kanë marrë ndihmë mjekësore për shkak të asfiksisë.
Personeli mjekësor ka ndërhyre menjëherë për të ofruar ndihmën e nevojshme, duke u kujdesur për stabilizimin e gjendjes së tyre.
