Prezenca e OSBE-së në Shqipëri ka mirëpritur zgjatjen e mandatit të Komisionit të Posaçëm për Reformën Zgjedhore.
Në një postim në “Facebook”, OSBE nxit komisionin që të përmirësojë legjislacionin sipas rekomandimeve të OSBE/ODIHR-it ndërsa shprehet e gatshme për të dhënë ndihmë teknike për rishikimin e sistemit zgjedhor.
“Prezenca e OSBE-së në Shqipëri mirëpret zgjatjen e mandatit të Komisionit të Posaçëm parlamentar për Reformën Zgjedhore. Zgjerimi i objektit të punës të Komisionit, për të filluar diskutimet lidhur me ndryshime thelbësore të sistemit zgjedhor, është një shenjë gatishmërie për të menduar më thellë për përmbushjen e nevojave dhe synimeve të shqiptarëve për demokracinë e tyre. Ne nxitim Komisionin të përmirësojë legjislacionin sipas rekomandimeve të OSBE/ODIHR-it, të bëra pas zgjedhjeve të viteve 2013, 2015 dhe 2017, si dhe e sigurojmë Komisionin për gatishmërinë tonë për të mbështetur me ndihmë teknike rishikimin e sistemit zgjedhor në Shqipëri.”
