Këshilli Bashkiak i Maliqit nis konsultimet për reformën territoriale, ndahen qëndrimet e banorëve.
Këshilli Bashkiak i Maliqit ka nisur turin e konsultimeve publike me banorët në kuadër të reformës së re administrative-territoriale. Takimi i parë u zhvillua në Njësinë Administrative Libonik, ku qëndrimet për të ardhmen e Bashkisë Maliq kanë qenë të ndara.
Një pjesë e banorëve, por edhe përfaqësues të Këshillit Bashkiak, janë shprehur kundër shkrirjes së Bashkisë Maliq dhe bashkimit të saj me Bashkinë Korçë.
Sipas tyre, një vendim i tillë do të rrezikonte shërbimet ndaj qytetarëve dhe do ta vështirësonte jetën e banorëve, veçanërisht në njësitë administrative.
Por në takim nuk kanë munguar as qëndrimet pro shkrirjes së Bashkisë Maliq. Disa banorë kanë argumentuar se struktura aktuale nuk është efikase dhe se bashkimi me Korçën mund të sjellë një administrim më të mirë.
Konsultimet publike do të vijojnë edhe në njësitë e tjera administrative të Bashkisë Maliq, ku pritet të mblidhen qëndrimet e komuniteteve për reformën e re administrative-territoriale.
