Ministri i Financave, Petrit Malaj, deklaroi sot se Ministria e Financave, në bashkëpunim me Agjencinë Suedeze të Zhvillimit, po finalizon projektin “Pro Tax Albania”, një nismë e rëndësishme që lidhet me reformën e taksës mbi pronën dhe përputhjen e saj me standardet e Bashkimit Europian.
Sipas ministrit, qëllimi kryesor i reformës është garantimi i një skeme të drejtë të taksimit të pronës në Shqipëri, si dhe forcimi i rolit të bashkive në mbledhjen e një prej taksave më të rëndësishme në nivel vendor. Ai theksoi se sistemi i ri i unifikuar, funksional dhe në linjë me kërkesat europiane është plotësisht i realizueshëm.
Malaj nënvizoi se procesi ka nisur në bashkëpunim me FMN-në, duke identifikuar problematikat e taksës aktuale të pronës, për t’u pasuar më pas me zbatimin e projektit “Pro Tax”, i cili synon vendosjen e një taksimi të drejtë, efektiv dhe transparent, të bazuar në vlerën reale të tregut. Pas një procesi të gjatë 7-vjeçar, tashmë është përfunduar hartimi i ligjit të ri të taksës së pasurisë, i cili së shpejti do t’i kalojë Këshillit të Ministrave për miratim.
Ministri bëri të ditur se në vitin 2027 do të zhvillohet procesi kombëtar i rivlerësimit të pronave, ndërsa periudha 2026–2027 do të shërbejë si fazë tranzitore deri në hyrjen në fuqi të ligjit të ri në vitin 2028. Ai shtoi se në vitin 2030 do të nisë edhe zbatimi i taksës mbi tokën ose truallin, çka do të përmbyllë plotësisht reformën e taksës së pasurisë në vend.
Ministri i Financave Petrit Malaj: Sot ne si ministri e Fiancave në bashkëpunim me Agjencinë Suedeze të Zhvillimit përmbyllim projektin “Pro Tax Albania” që ka të bëjë me reformën e takës mbi pronën. Ky projekt është në linjë me reformat që qeveria po ndërmerr edhe në kuadër të integrimit të vendit në BE. Qëllimi ynë është garantojmë një taksim të drejtë të pronës në Shqipëri si dhe të forcojmë rolin e bashkive për mbledhjen e një prej taksave më të rëndësishme jo vetëm në rajon por edhe më gjerë. Zbatimi i një sistemi funksional, të unifikuar dhe sipas standardeve të BE është tërësisht i realizueshëm.
E kemi nisur këtë rrugëtim me FMN dhe kemi identifikuar problematikat që karakterizonin taksën mbi pronën. Më pas nisëm zbatimin e projektit “Pro Tax” për të garantuar reformën e taksës së pronës bazuar në vlerën e tregut, për ta bërë më të drejtë, efektive dhe transparente, por edhe për ta kthyer në burimin kryesor të të ardhurave për bashkitë. U deshën 7 vite, procesi ishte kompleks, për të arritur në këtë stad ku jemi. Tashmë kemi përfunduar hartimin e ligjit të taksës së pasurisë dhe shumë shpejt do t’i kalohet Këshillit të Ministrave për miratim. Në vitin 2027 do të kryejmë procesin kombëtar të vlerësimit të pronave. Viti 2026-2027 do të shërbejnë si periduhë tranzitore deri në aplikimin e ri të ligjit i cili hyn në fuqi në vitin 2028. Në vitin 2030 do të nisë zbatimi i taksës mbi tokën apo truallin dhe kjo do të jetë edhe finalizimi i reformës në taksën e pasurisë.
