Shorti i fazës së play-off-it në Champions League dhuron duele shumë interesante. Golat e ndeshjes kanë rikthyer në vëmendje duelin spektakolar të javës së fundit të fazës së ligës mes Real Madridit dhe Benfikës. Portugezët ishin ata që e mundën 4-2 skuadrën madrilene dhe e nxorën jashtë tetëshes më të mirë… dhe tani derbi iberik rikthehet në play-off. Kush kalon nga ky çift në çerekfinale do të luajë me Sporting Lisbonën ose Manchester City.
I bukur në play-off edhe derbi francez mes Paris Saint-Germain dhe Monakos. Kampionët në fuqi dështuan në duelin e fundit të fazës së ligës të kualifikoheshin direkt dhe tani shorti i play-off-it i ka vënë përballë skuadrën e Principatës, Monakon. Kush kalon nga ky çift në 1/8 do të gjejë një kundërshtar dukshëm të fortë, Chelsean ose Barcelonën.
Inter, finalist i edicionit të kaluar në Champions, do të luajë kundër surprizës Bodo/Glimt. Norvegjezët bënë një mrekulli në fazën e ligës, pasi fituan dy takimet e fundit ndaj Manchester Cityt dhe Atletico Madridit. Fituesi i çiftit Inter–Bodo/Glimt do të përballet në fazën e 1/8 me Manchester City ose Sporting Lisbonën.
Juventusi ka përshkuar në play-off Galatasarain. Short jo i lehtë për bardhezinjtë, të cilët kanë një precedent jo të lumtur me turqit, pasi në 2013, kur drejtoheshin nga Conte, skuadra e njohur nga Stambolli i eliminoi nga faza e grupeve. Kush kalon nga çifti Juventus–Galatasarai me siguri do të gjejë në 1/8 një ekip anglez, Liverpoolin ose Tottenhamin.
Për t’u ndjekur edhe përplasja Dortmund–Atalanta, sfida italo-gjermane, teksa fituesja e këtij çifti në 1/8 do të ketë punë me pretendentët Arsenal ose Bayern. Duelet e tjera të play-off-it janë Olympiakos–Leverkusen, Brugge–Atletico Madrid dhe Karabak–Newcastle.
Takimet e para të play-off-it do të luhen më 17–18 shkurt, ndërsa ato të kthimit më 24–25 shkurt. Vizion Plus do të transmetojë ndeshjet më të mira të mërkurave më 18 dhe 25 shkurt./vizionplus.tv
