Ndërkombëtarët kanë reaguar pas fitores së konservatorëve në Gjermani
Presidenti amerikan Donald Trump e ka cilësuar si një ditë të mrekullueshme për vendin.
“Ashtu si SHBA-të, populli i Gjermanisë u lodh nga agjenda e paarsyeshme, veçanërisht për energjinë dhe emigracionin, që ka mbizotëruar për kaq shumë vite. Kjo është një ditë e mrekullueshme për Gjermaninë.”, tha Trump.
Kryeministri hungarez Viktor Orban përgëzoi edhe AfD-në për dyfishimin e rezultatit krahasuar me vitin 2021.
“Populli i Gjermanisë votoi për ndryshim në një numër të madh. Unë dua të përgëzoj Alice Weidel për dyfishimin e pjesës së votave të AfD. Fat i mirë dhe Zoti e bekoftë Gjermaninë!“, tha Orban.
Presidenti francez Emmanuel Macron u shpreh i gatshëm për të bashkëpunuar me qeverinë e re gjermane.
“Sapo fola me Friedrich Merz për ta uruar për fitoren e tij në zgjedhjet gjermane. Ne jemi më të vendosur se kurrë për të arritur gjëra të mëdha së bashku për Francën dhe Gjermaninë, dhe për të punuar drejt një Evrope të fortë dhe sovrane. Në këtë kohë pasigurie, ne jemi të bashkuar për të përballuar sfidat kryesore të botës dhe kontinentit tonë.”, tha Macron.
Një urim erdhi edhe nga kryeministri britanik Keir Starmer.
“Urime Friedrich Merz dhe CDU/CSU për rezultatet në zgjedhjet në Gjermani. Mezi pres të punoj me qeverinë e re për të thelluar marrëdhëniet tona tashmë të forta, për të rritur sigurinë tonë të përbashkët dhe për të ofruar rritje për të dy vendet tona.“ishte urimi i Starmer.
Ndërsa presidenti ukrainas Volodymyr Zelensky e vuri theksin tek bashkëpunimi për të sjellë paqen në vendin e tij.
“Ne mezi presim të vazhdojmë punën tonë të përbashkët me Gjermaninë për të mbrojtur jetët, për të sjellë paqen e vërtetë më afër Ukrainës dhe për të forcuar Evropën. Evropa duhet të jetë në gjendje të mbrojë veten, të zhvillojë industritë e saj dhe të arrijë rezultatet e nevojshme.”, tha Zelensky.
Sakaq, sekretari i përgjithshëm i NATOS, Mark Rutte, e cilësoi fitoren e konservatorëve si një moment vendimtar për të punuar për sigurinë e përbashkët.
