Agjencia Ndërkombëtare e Energjisë Atomike publikoi të martën një raport lidhur me sigurinë bërthamore dhe situatën e sigurisë në Ukrainë. Një ekip i agjencisë inspektoi centralin bërthamor të Zaporizhias, që ndodhet në pjesën jugore të Ukrainës. Drejtori i Përgjitshshëm i agjencisë do të informojë gjithashtu Këshillin e Sigurimit të Kombeve të Bashkuara mbi gjetjet e ekipit të tij.
Inspektorët e Agjencisë Ndërkombëtare të Energjisë Atomike, mbërritën në centralin e Zaporizhia më 1 shtator. Ata vlerësuan dëmet në objekt, funksionimin e sistemeve të sigurisë dhe kushtet e punonjësve të centralit që është vënë nën kontrollin rus që nga ditët e para të agresionit në Ukrainë.
Rusia dhe Ukraina kanë akuzuar njëra-tjetrën si përgjegjëse për bombardimet në zonën pranë centralit bërthamor. Sulmet kanë rritur shqetësimet ndërkombëtare lidhur me mundësitë e një katastrofe bërthamore.
Agjencia Ndërkombëtare e Energjisë Atomike tha se dy ekspertë të saj do të qëndrojnë në central për të vëzhguar situatën dhe ofruar vlerësime të pavarura.
“Prania e dy ekspertëve të agjencisë bërthamore do të ofrojë informacion të plotë për atë që po ndodh atje, pasi ka deklarata të shumta nga Federata Ruse. Agjencia Ndërkombëtare e Energjisë Atomike ka një mandat teknik nga OKB-ja dhe mendoj se nëse raporti është mjaft i sinqertë, mund të bëhet pikënisje për largimin e rusëve nga vendimmarrja në organizatat ndërkombëtare. Po ashtu do të shërbejë si bazë për vendosjen e sanksioneve ndaj korporatave të mëdha si Rosatom”, thotë Hryhoriy Plachkov, ish-kreu i Inspektoratit Rregullator Shtetëror Bërthamor të Ukrainës.
Kompania shtetërore bërthamore e Ukrainës tha të hënën se centrali në Zaporizhia ishte shkëputur nga rrjeti elektrik për shkak të bombardimeve ruse.
Presidenti i Ukrainës, Volodymyr Zelenskyy, tha përmes një video-mesazhi të hënën se centrali bërthamor ndodhet një hap larg katastrofës.
Ministri ukrainas i Energjisë, German Galushchenko, tha në rrjetin Facebook se kompania shtetërore ukrainase Energoatom nuk ishte në gjendje të bënte riparime ndërsa vazhdonin luftimet rreth centralit.
Agjencia Ndërkombëtare e Energjisë Atomike, tha se ishte informuar nga Ukraina se linja rezervë e tensionit nuk ishte dëmtuar dhe se ekspertët pritet ta rilidhin centralin në rrjet gjatë ditëve në vijim./voa
