Prodhimi global i kokainës ka arritur nivele rekord, si pasojë e rritjes së madhe të kërkesës pas përfundimit të izolimit për shkak të pandemisë. Ky është përfundimi që ka arritur një raport i ri i Kombeve të Bashkuara në lidhje me prodhimin dhe trafikimin e kokainës.
Zyra e OKB-së për Drogën dhe Krimin tha se kultivimi i kokainës u rrit me 35% midis vitit 2021 dhe 2022 , një shifër kjo rekord.
Në raport përmendet më shumë se 30 herë emri Shqiperi ose shqiptar , duke i vënë një rol shumë të madh grupeve kriminale shqipfolëse në tregun botëror të drogës.
Raporti thotë se nga Holanda shpërndahet kokaina drejt vendeve të tjera evropiane dhe bandat shqipfolëse duket se luajnë një rol të rëndësishëm në këtë, sidomos në trafikimin drejt Shqipërisë dhe Italinë. Një destinacion tjetër i rëndësishme është ai i Mbretërisë së Bashkuar, ku është vlerësuar se grupet shqipfolëse ushtrojnë kontroll të konsiderueshëm në treg.
Përveç epiqendrave tradicionale, baza të reja trafiku janë hapur në edhe në Afrikën perëndimore dhe qendrore. Po ashtu theksohet se trafikantët po përdorin gjithmonë e më shumë shërbimet postare ndërkombëtare për të dërguar produktin e tyre te konsumatori.
Tregjet më të mëdha për kokainën mbeten Europa dhe Amerika e Veriut, të ndjekur nga Amerika e Jugut, ajo Qendrore dhe Karaibet.
Kolumbia ende dominon rrugët e trafikut, edhe pse ato europiane janë zhvilluar. Gjithashtu raporti zbulon se grupet kriminale meksikane dhe ato ballkanike, ku hyjnë edhe ato shqiptare, janë afruar edhe më shumë me qendrat e prodhimit, për të fituar akses te furnizimi me kokainë.
Ndërsa në Ukrainë tregu i kokainës ishte duke u rritur, por që nga nisja e pushtimit rus shkurtin e vitit të kaluar, kërkesa ka rënë ndjeshëm.
