Rama: Silva Bino kishte mundësi të ikte në Turqi, por zgjodhi të kurohej te Infektivi

Kryeministri Edi Rama lajmëroi nga Vlora që të dyshuarit me koronmavirus nuk kanë pse të bëjnë tamponin tek privatit, por të ndjekin këshillat e mjekëve. Sipas tij, ata duhet të flasin fillimisht me mjekun e familjes dhe jo t’i drejtohen menjëherë privatit.
“I çmendën njerëzit me teste, por ne kemi ndjekur një politikë të suksesshme. Komiteti Teknik nuk e ka kërkuar testin pozitiv. Një pjesë e madhe e njerëzve shkojnë bëjnë tamponë tek privati. Ne iu themi se nëse nuk je mirë, qëndro në shtëpi, bëj ato që thotë mjeku, s’ke nevojë të bësh tamponin. Turren të shkojnë të bëjnë tamponë tek privati me kosto marramendëse dhe marrin ilaçe që ose nuk iu bëjnë gjë ose iu bëjnë dëm. Nuk kanë pse ta bëjnë, nëse nuk iu thotë mjeku. Është një sëmundje dreqi, që nuk dihet si të kap, por janë ca etapa që tashmë i kemi thënë hapat me të cilat duhet ta luftosh. Kur je në kushtet e shtëpisë, nuk ke pse blen ilaçe kot. Privatet të ngarkojnë me ilaçe se janë të lidhur me farmacitë, por merr mjekun e familjes”, tha Rama.
Për Ramën, spitalet në Shqipëri ofrojnë gjithçka që e gjejnë edhe në Turqi. Ai përmendi rastin e shefes së epidemiologjisë Silva Bino, e cila u infektua me COVID dhe për të cilën tha se zgjodhi të kurohej në spitalet tona, pavarësisht mundësisë që kishte për t’u trajtuar në Turqi.
“Pse çoni politikanë në Turqi? Damian Gjiknuri nuk është në Turqi, ministrat nuk janë në Turqi, shefja e Epidemiologji e pati në gjendje të rëndë, nuk iku në Turqi, e kaloi në Spitalin Infektiv të Tiranës. Ka mundësi të shkojë në Turqi, por shkoi tek Spitali Infektiv i Tiranës, por e di shumë mirë se në Turqi nuk ka asgjë më shumë sesa këtu. Mjekët dhe infermierët tanë janë heronj”, deklaroi Rama.




