Kryeministri Edi Rama publikoi disa foto nga procesi i vaksinimit antiCovid tek shtëpia e të moshuarve në Shkodër, ndërsa ka shpërndarë edhe një mesazh.
Ai premtoi se siç ndodhi me rimëkëmbjen e mijëra familjeve të mbetura pa banesa pas tërmetit të 26 nëntorit të 2019, po njësoj do të veprohet edhe me vaksinimin e qytetarëve.
“Mos e harroni që të nesërmen e tërmetit askush s’e besonte që do t’ia dilnim rimëkëmbjes së atyre mijëra e mijëra familjeve të mbetura pa strehë – por ne po e fitojmë hap pas hapi betejën e Rindërtimit, për të gjitha ato familje dhe për Tiranën, Durrësin, Kurbinin, Krujën, Vorën, Kamzën, Lezhën, Mirditën, Kavajën, Rrogozhinën e krejt Shqipërinë. Po njësoj do t’ia dalim vaksinimit të të gjithë qytetarëve të këtij vendi, hap pas hapi, duke e kapërcyer malin e vështirësive, siguruar të gjitha dozat e nevojshme dhe vaksinuar krejt popullin aspak më vonë se sa vendet e tjera, në Europë e në rajon po se po”, shkruan kreu i qeverisë.
