Kryeministri Edi Rama mirëpriti në Tiranë ish-presidentin e Francës, François Hollande, të cilin e nderoi me medaljen e artë të mirënjohjes publike për kontributin e tij në forcimin e marrëdhënieve mes dy vendeve.
Në rrjetet sociale, kreu i qeverisë e cilësoi vizitën e ish-kreut të shtetit francez në Tiranë si një privilegj duke e vënë theksin tek mbështetja e tij e vazhdueshme për Shqipërinë.
“Në shenjë mirënjohjeje për miqësinë, mbështetjen dhe kontributin e tij në forcimin e marrëdhënieve mes Shqipërisë dhe Francës, pata nderin t’i akordoj Medaljen e Artë të mirënjohjes publike” shprehet kryeministri Rama.
Rama vlerësoi gjithashtu rolin e ish-presidentit Hollande në promovimin e Shqipërisë në arenën ndërkombëtare dhe mbështetjen për integrimin europian.
