Sot përkujtohet 8 Dhjetori, dita kur studentët e të rinjtë dolën në rrugë për të rrëzuar regjimin komunist.
Kryeministri Edi Rama tha në “Facebook” se këto 30 vite kanë qenë të jashtëzakonshme për shoqërinë shqiptare.
Ai shtoi se është i privilegjuar që sot është në krye të qeverisë për të ndihmuar Shqipërinë të bëjë përpara.
“30 VJET janë shumë në rrugën e një njeriu, por jo edhe aq në rrugën e historisë së një vendi e sidomos kur kjo është koha e kalimit nga një diktaturë ekstreme, në një demokraci funksionale. Bëhen plot 30 VJET sot nga dita, apo më saktë mbrëmja e daljes së studentëve në rrugën pa kthim të daljes prej diktaturës. Vite të jashtëzakonshme në jetën e shoqërisë sonë dhe një privilegj i jashtëzakonshëm të qenurit pjesë aktive e përpjekjeve përgjatë kësaj rruge, së bashku me nderin e madh të udhëheqjes së vendit në 7 vitet e fundit, pavarësisht thinjave të shtuara me një shpejtësi marramendëse në këto vite😊.”
