Kryeministri Edi Rama, i cili ndodhet në Zvicër ku mori pjesë në Forumin Ekonomik Botëror 2025, ka zhvilluar një takim me kreun e Marrëdhënieve me Qeveritë dhe Politikën Publike të TikTokut për Europën.
Rama bën me dije se u vendosën disa piketa bashkëpunimi në javët e muajt në vijim, për të siguruar rihapjen e TikTokut në një kohë sa më të arsyeshme. Rama i qëndron vendimit të marrë në dhjetor për të mbyllur përkohësisht platformën.
Edi Rama: Davos, Forumi Ekonomik Botëror – Me Christine Grahn, kreun e Marrëdhënieve me Qeveritë&Politikën Publike të TikTokut për Europën, shtruam shqetësimet që na çuan në vendimin e mbylljes së përkohshme të aksesit në platformë nga Shqipëria, si edhe dëgjuam rrugët e mundshme të adresimit të tyre nga ana e kompanisë. Një diskutim plotësisht i hapur dhe me frymë konstruktive, ku vendosëm disa piketa bashkëpunimi në javët e muajt në vijim, për të siguruar rihapjen e TikTokut në një kohë sa më të arsyeshme, por sigurisht me të gjitha garancitë e nevojshme, në mungesë të të cilave jemi të detyruar ta mbyllim së shpejti aksesin në platformë.
Vendimi për mbylljen e Tik Tok për një periudhë 1-vjeçare u mor pas një konsultimi të gjerë publik pas vrasjes së 14-vjeçarit Martin Cani. Ngjarja e rëndë ndodhi në nëntor 2024 jashtë ambienteve të shkollës “Fan Noli” në Tiranë.
Autor i dyshuar i ngjarjes është 14-vjeçari Mario Përlleshaj i cili u arrestua dhe ndodhet në burgun e të miturve në Kavajë.
