Dy grupimet e partisë Demokratike kanë goditur në Gjykatën Kushtetuese marrëveshjen mes qeverisë shqiptare dhe asaj italiane për strehimin e përkohshëm të emigrantëve në zonën e Lezhës. Ankimimi i parë është depozituar me firmën e Lulzim Bashës, i cili ka shfrytëzuar të drejtën që kushtetuta i jep që të vendosë në lëvizje gjykatën si kryetar i Partisë Demokratike.
Lexo edhe :
Related Posts
Ankimimi i dytë është dorëzuar nga deputetët e grupit parlamentar demokrat të drejtuar nga Sali Berisha e Gazment Bardhi dhe deputetët e Partisë së Lirisë.
LINDITA METALIAJ
“Kjo ka të bëjë me Ramën, që ka vendosur që Shqipërinë dhe shqiptarët ta trajtojë si pronë të veten. Ai nuk mund të vendosë për fatin tonë. Jemi falënderues dhe mirënjohës qeverisë italiane për mbështetjen që i kanë dhënë Shqipërisë dhe shqiptarëve. S’ka të bëjë me marrëdhënien me Italinë”
Sipas opozitës kjo marrëveshje bie ndesh me kushtetutën, pasi nuk është marrë plotfuqia e presidentit për të negociuar draftin. Nga ana tjetër sipas opozitës kjo marrëveshje shkel kushtetutën, ku garantohet se të huajt që qëndrojnë në vendin tonë gëzojnë të njëjtat të drejta si qytetarët shqiptarë.
Sipas ligjit për Gjykatën Kushtetuese dy kërkesat e opozitës do të shqyrtohen paraprakisht nga një kolegj i përbërë nga 3 gjyqtarë të cilët vendosin nëse cështja kalon apo jo në seancë plenare. Në rast se kërkesat e opozitës kalojnë në seance plenare atëherë procedura e miratimit të marrëveshjes në parlament pezullohet. Më pas Gjykata Kushtetuese ka afat deri në 6 mars që të vendosë nëse marrëveshja mes Shqipërisë dhe Italisë për emigrantët është apo jo në përputhje me ligjin themeltar të shtetit.
