Kryesocialisti Edi Rama në vijim të takimeve elektorale u ndal në një takim këtë të mërkurë me qytetarët e Poliçanit.
Në fjalën e tij ai tha se qeveria socialiste në mandatin e katërt do të ndërtojë rrugën e re Berat-Poliça-Skrapar.
Sipas tij kjo rrugë e re jo vetëm që do të ngushtojnë largësinë mes qyteteve si me Tiranën apo Përmetin, por do të sjellë më shumë turistë.
“Në mandatin e katërt kemi përcaktuar si pjesë të planit tonë edhe rrugën e re Berat-Poliçan-Skrapar. Rruga e re do të ngushtojë shumë distancën, do të rrisë shpejtësinë e lidhjes tuaj jo vetëm me Beratin por dhe me Tiranën. Do të lidhë Skapraparin me Përmetin dhe do të sjellë shumë më tepër turizëm”, tha Rama.
Më tej kryesocialisti premtoi se shumë shpejt do të hapet dhe Kombinati i Poliçanit për prodhimin e armëve. Ai tha se kanë nisur negociatat me disa kompani dhe pritet që së shpejti të nisë puna.
“Jemi duke punuar dhe në kuadër të rillidjes së industrisë ushtarake edhe kombinatin e Poliçanit e kemi pjesë të planeve tona. Jemi duke diskutuar me disa palë të interesura. Shpresoj se së shpejti do të kemi rezultate. Shpresoj se së shpejti do të hapim Kombinatin. Në kushtet kur Europa është shumë e interesuar për prodhimet ushtarake, edhe ne e kemi krijuar këtë proces”, deklaroi më tej kryesocialisti.
