Bashkimi Evropian nuk i ka përmbushur premtimet ndaj Ballkanit Perëndimor. Kryeministri Edi Rama ka kritikuar sërish anëtarët e bllokut duke i akuzuar se po pengojnë procesin e integrimit.
EDI RAMA
KRYEMINISTER
“Asgjë nuk ka ndryshuar, jemi në të njëjtin pozicion në integrimin në Bashkimin Evropian dhe kjo nuk ka ndodhur vetëm për Shqipërinë dhe Maqedoninë e Veriut, por në përgjithësi, asgjë nuk ka ndryshuar në marrëdhëniet midis BE dhe Ballkanit. Njëherë e një kohë, na u tha që ky proces, procesi i integrimit, do të shtypte disi nacionalizmin ballkanik. Por sot, ne jemi peng i nacionalizmit evropian. Dhe kjo është e trishtueshme.”
Edhe pse synimi kryesor është anëtarësimi në Bashkimin Evropian, Rama vuri në dukje rëndësinë e bashkëpunimit në rajon.
“Ne duhet të shtyjmë dhe për këtë arsye ne vendosëm me partnerët tanë në rajon Maqedoninë e Veriut dhe Serbinë jo për të krijuar diçka që do të jetë kundër vizionit tonë por të krijojmë një shembull dhe të tregojmë se kjo është ajo çfarë kërkojnë qytetarët tanë. Lirinë e lëvizjes që kërkojnë në Bashkimin Evropian ne i ofrojmë në rajon në pritje që të jemi pjesë në familjen e madhe e BE.”
Ndërkohë, Kosova i ka kërkuar Greqisë t’i bashkohet vendeve evropiane që e njohin pavarësinë.
ALBIN KURTI
KRYEMINISTER I KOSOVËS
“Njohja e shtetit tonë, bashkëpunimi në rajon dhe përfshirja sa më e shpejtë e rajonit në Bashkimin Evropian, është rruga e duhur drejt paqes, stabilitetit dhe sigurisë afatgjate. Të mos harrojmë që 22 nga 27 shtete anëtare të BE-së tashmë e kanë njohur Republikën e Kosovës sikurse edhe 26 nga 30 shtetet anëtare të NATO-s.”
Maqedonia e Veriut dhe Greqia kanë nënshkruar një marrëveshje për ndërtimin e gazsjellësit natyror.
ZORAN ZAEV
KRYEMINISTER I MAQEDONISË SË VERIUT
“Eshtë një projekt shumë i madh, rreth 100 milionë euro. Eshtë një ndërlidhës i gazit natyror që hap një mundësi të madhe, jo vetëm për Maqedoninë e Veriut, por edhe për Serbinë, Kosovën, Ballkanin Perëndimor, e cila më në fund do të sjellë diversifikimin e gazit natyror. vendi ynë po bëhet një korridor energjie për vendet e Evropës Juglindore.”
Këto deklarata, udhëheqësit e Ballkanit Perëndimor i bënë në ditën e dytë të edicionit të 25-të të tryezës “The Economist” , në Athinë, me temë “Evropa Juglindore: Rritja e Bashkëpunimit dhe Solidariteti”.
