Përfaqësuesja e Lartë për Politikën e Jashtme dhe Sigurisë së Bashkimit Europian, Kaja Kallas ditën e sotme ka vizituar Shqipërinë.
Ajo u prit në ambientet e kryeministrisë nga ministri për Evropën dhe Punët e Jashtme, Igli Hasani dhe shefi i qeverisë Edi Rama.
Pas firmosjes së marrëveshjes për financimin e hekurudhës Durrës – Rrogozhinë, pjesë e Korridori VIII mes ministres së Energjisë dhe Infrastrukturës, Belinda Balluku dhe drejtorit të Bankës Evropiane për Investime, Lionel Rapaille, Rama dhe Kallas mbajtën një konferencë të përbashkët për shtyp.
Rama e nisi fjalën e tij me batuta.
“Më në fund e mbajte fjalën që ma kishe dhënë përpara si përfaqësuese e vendit tënd, por erdhe si përfaqësuese e të gjitha vendeve”, tha ai duke iu drejtuar shefes së diplomacisë së BE-së.
Rama zbardhi edhe pjesë nga diskutimi që pati gjatë takimit me zonjës Kallas. Ai tha se diskutuan për rrugën e Shqipërisë drejt integrimit si dhe për rajonin.
Rama: Kemi folur për sfidën e madhe të procesit drejt anëtarësimit të BE-së, për kalendarin e dakordësuar me komisionin për mbylljen e negociatave brenda viti 2027. Kemi folur dhe për rajonin dhe problematikat në rajon, në një moment kur e kemi të domosdoshëm unitetin dhe stabilitetin e gjithë rajonit. Të gjitha vendet kanë synim të shpallin strategjitë për anëtarësim në BE. Ky destinacion është një pikë referimi për të kuptuar edhe politikën e ditës dhe hapat që të gjithë së bashku duhet të kemi në të përditshmen tonë që i gjithë ky rajon të bëhet pjesë e familjes evropiane.
Rama tha se diskutime janë zhvilluar edhe për fushën e sigurisë e cila është një temë qëndrore edhe në politikën e BE-së.
Rama: Dua të theksoj që partneriteti për siguri dhe mbrojtje është një hap që pasohet nga të tjerë hapa dhe dialogu për këtë partneritet do të jetë i vazhdueshëm. Pjesë e këtij partneriteti Shqipëria do të jetë edhe si anëtare e BE-së. Kaja është një mbështetëse e palëkundur e procesit të anëtarësimit, mbështetëse e unifikimit të gjithë Evropës nën umbrellën e BE dhe mbështetëse palëkundur deri tani e Shqipërisë. Është një vlerë e çmuar për ne dhe ne e çmojmë shumë./vizionplus.tv
