Radhë të gjata janë shënuar këtë të enjte në pikën e kalimit kufitar të Qafë Thanës, që lidh Shqipërinë me Maqedoninë e Veriut. Fluksi i lartë i lëvizjeve në të dy anët e kufirit ka shkaktuar pritje të gjata për udhëtarët, të cilët raportojnë se detyrohen të presin mbi 45 minuta për të kaluar në territorin tjetër.
Sipas autoriteteve kufitare, fluksi ka nisur që prej orës 09:00 të mëngjesit dhe vijon me intensitet gjatë gjithë ditës. Shkak për këtë situatë është bërë periudha e pushimeve në Maqedoninë e Veriut, ku qytetarët përfitojnë katër ditë të lira dhe zgjedhin bregdetin shqiptar si destinacionin e tyre të preferuar.
Udhëtarët nga Maqedonia e Veriut shprehen se kanë zgjedhur Shqipërinë për pushime për shkak të afërsisë dhe mikpritjes, ndërsa apelojnë për përmirësim të shërbimit në kufi, sidomos në raste fluksi të lartë.
Policia kufitare shqiptare deklaron se po punon me kapacitet të plotë në të dy drejtimet, duke shtuar sportelet dhe stafin në dispozicion. Megjithatë, pala maqedonase nuk ka pranuar të zbatojë një procedurë të përshpejtuar, pavarësisht kërkesave të përsëritura nga pala shqiptare.
Vetëm gjatë ditës së sotme, përmes kësaj pike kufitare kanë hyrë dhe dalë mbi 8000 shtetas, duke e kthyer Qafë Thanën në një nga pikat më të ngarkuara të kufirit gjatë kësaj periudhe.
