Presidenti ukrainas Volodymyr Zelensky komentoi nga Berlini se Rusia, pavarësisht pritjeve të bashkësisë ndërkombëtare, nuk ka sjellë asgjë të re në tryezën e negociatave dhe vazhdon të përsërisë ultimatumet e vjetra, kur iu kërkua të komentonte mbi kushtet që dyshohet se i ka vendosur Putini për t’i dhënë fund luftës.
Gjatë një konference të përbashkët për shtyp me kancelarin gjerman Friedrich Merz, Zelensky theksoi gjithashtu se Ukraina nuk pranon asnjë kusht për arritjen e një armëpushimi.
Lexo edhe :
“Bota ka më shumë se një javë që pret që Rusia të përfundojë të ashtuquajturin memorandum, i cili është i nevojshëm për të ndaluar vrasjen e njerëzve. Deri më tani ata nuk kanë paraqitur asgjë të re, vetëm riprodhime të të njëjtave ultimatume në diskursin publik”, theksoi presidenti ukrainas.
Presidenti i Ukrainës ia atribuoi thelbin e luftës “një dëshire absolutisht kriminale nga Rusia për të vrarë njerëz dhe për të shkatërruar jetë …”.
Siç tha ai, Rusia duhet ta braktisë këtë mentalitet që të ketë paqe të vërtetë.
Që kjo të ndodhë, theksoi Zelensky, është e nevojshme të vazhdohen dhe të intensifikohen presionet.
“Ne kemi nevojë për të gjitha format e presionit që do ta bëjnë Rusinë të ndiejë pasojat e këtyre veprimeve të turpshme.”
“Zgjatja e luftës duhet të jetë e dhimbshme për Moskën, dhe kjo është e mundur. Gjermania na mbështet në këtë përpjekje,” vuri në dukje ai.
Kujtojmë se më 19 maj, Presidenti rus Vladimir Putin pati një bisedë telefonike dy-orëshe me Presidentin e SHBA-së Donald Trump.
Pas bisedës, Putin njoftoi se Moska është e gatshme të punojë me palën ukrainase mbi një “memorandum” që do të përcaktojë parimet themelore për një marrëveshje të mundshme paqeje.
Megjithatë, Zelensky theksoi se Ukraina nuk ka informacion se çfarë përmban saktësisht ky memorandum rus.
“Ne nuk e dimë se cilat parime dëshiron të përfshijë Rusia në këtë memorandum”, tha ai.
Udhëheqja ukrainase këmbëngul se çdo propozim paqeje duhet të jetë i pakushtëzuar dhe i bazuar në rivendosjen e sovranitetit të Ukrainës. Zelensky hodhi poshtë çdo përpjekje për të imponuar kushte përmes rrjedhjeve publike të informacionit dhe i karakterizoi deklaratat e Moskës si truke propagandistike pa asnjë bazë thelbësore./vizionplus.tv
