Presidenti rus, Vladimir Putin deklaroi se bota po i nënshtrohet një sërë ndryshimesh dramatike, të cilave vetëm një vend i fortë, i qëndrueshëm dhe sovran mund të mbijetojë. Këto deklarata të Putin erdhën gjatë fjalës së tij në një forum investimesh të mbajtur në Moskë.
“Bota ka hyrë në një epokë ndryshimesh dramatike dhe sfidash serioze, jo vetëm për kompanitë dhe industritë individuale, por edhe për vende dhe rajone të tëra të botës. Vetëm një vend i fortë, i qëndrueshëm dhe dominues mund ta kalojë me sukses këtë fazë dhe të bëhet një nga qendrat e zhvillimit të ekonomisë së re botërore. Unë patjetër dua ta theksoj këtë, një vend sovran”, tha presidenti rus.
Ndonëse një pjesë e mirë e superfuqive botërore i kanë vendosur sanksione, Putin theksoi se GDP-ja e vendit po rritet më shpejt se më parë nga vendosja e sanksioneve.
Ai nënvizoi se mijëra kompani të huaja kanë investuar në Rusi që nga fillimi i vitit 2022.
Presidenti rus e quajti “të vjetëruar” idenë e globalizimit, që sipas tij po zëvendësohet nga një model shumëpolar. Sipas Putinit, ideja e globalizimit ishte që të gjithë të vendoseshin në një pozitë të barabartë, por në praktikë kjo nuk ka ndodhur.
“Sot vendet perëndimore në marrëdhëniet ekonomike veprojnë me parimin “mik apo armik”. Në këtë rast, një i huaj mund të shohë asetet e tij të bllokuara, hequr ose likuiduar, gjë që u vërtetua nga situata me Nord Streams”, tha ai.
Putin shtoi se është e qartë se këto veprime shkatërrojnë sistemin e marrëdhënieve financiare, tregtare dhe ekonomike që janë ndërtuar gjatë dekadave nga vetë Perëndimi.
