Emocionet e mëdha të sezonit të ri në futbollin europian do të nisin sonte me trofeun e parë të rëndësishëm, Superkupën e Evropës, që do të ndahet mes PSG dhe Tottenham.
Dueli i rëndësishëm që transmetohet në Vizion Plus në orën 21:00, luhet në stadiumin e Udines në Itali. Parizienët, të cilët fituan për herë të parë UEFA Champions League duke dërrmuar keq në finale Interin 5 me 0, kanë përballë fituesen e UEFA Europa League.
Anglezët mundën në finale, në derbin britanik të kupës së dytë në Europe për nga rëndësia, Manchester United. Vlen të theksohet fakti se skuadra franceze ka dështuar vetëm 1 nga 5 trofetë e mundshëm të 2025. Në Francë fituan gjithçka, dy kupat kombëtare dhe kampionatin, dhe në fund, qershia mbi tortë, Champions League. Skuadra e Luis Enriques dështoi vetëm në finalen e Botërorit të Klubeve ku u mund nga Chelsea.
Shqetësimi i vetëm sonte i parizienëve është porta. Në mënyrë të befasishme, trajneri Luis Enrike la jashtë të grumbulluarve për këtë ndeshje portierin italian Donnarumma, për të cilin tha se është thjesht një zgjedhje e tij teknike, fakti që nuk dëshiron më që ai të jetë pjesë e projektit. Nuk dihet nëse sot do të jetë titullar portieri i dytë Safonov apo do të luajë i sapobleri në merkato, Lukas Shevalier, që u mor nga Lille për 40 mln euro.
Nga stoli, ndërkohë, do ta nisë ndeshjen blerja e fundit, ukrainasi Zabarni që erdhi nga Bournemouth për 42 mln euro.
Disa shkëndija brenda PSG sidoqoftë janë të ndjeshme. Veç çështjes Donnarumma, ka edhe një çështje që mund të shpërthejë edhe më shumë mes Hakimit dhe Dembele, dy kandidatë për Topin e Artë. Mbrojtësi maroken tha në një intervistë se ai e meriton Topin e Artë më shumë se sulmuesi francez, shoku i tij i skuadrës, Dembele.
Në krahun tjetër, Tottenham është ndjeshëm jofavorit në këtë ndeshje. Ka ende probleme te londinezët në organikë, sidomos për faktin që nuk janë zëvendësuar emra si Min Son apo Maddison. I pari është larguar në merkato te Los Angeles Galaxy dhe i dyti është dëmtuar rëndë. Blerjet e fundit, Kudus dhe Palhinha, do të luajnë nga minuta e parë. Kjo është ndeshja e parë e rëndësishme me Tottenham për trajnerin e ri të Spursave, Thomas Frank.
/vizionplus.tv
