Nga Ervin Sina
Inter-Paris Saint-Germain do të jetë një betejë e vërtetë, gjë të cilën e paralajmëruan në konferencën e fundit për shtyp të dy trajnerët.
Fillimisht Simone Inzagi i shoqëruar nga Barela dhe Lautaro Martinez, doli i pari përpara gazetarëve dhe shpjegoi që për Interin të qenit në finale është një krenari, por një rezultat mjaft i merituar.
Ai shtoi se finalet vendosen nga episodet, por këmbënguli se triumfi në Europë nuk është obsesion për zikaltërit, një qëndrim që tentoi të shmangte një lloj presioni në skuadër duke qenë se para dy vitesh skuadra italiane u mund në finale nga Manchester City.
Grupi i lojtarëve të Interit, sikurse u pa edhe në stërvitjen e fundit, është i plotë dhe e vetmja dilemë, siç u kuptua nga qëndrimet e Inzagit, është nëse në mbrojtje do të luajë Pavard apo Bisek.
Nga ana tjetër, Luis Enrike u duk i qetë në konferencën për media. Ai tha se me kaq shumë ndeshje të rëndësishme dhe finale sa Parisi ka luajtur kohët e fundit, edhe pse në trofetë kombëtare, nuk do të jetë problem ambientimi në atmosferën e Allianz Arenës.
Tekniku spanjoll vlerësoi Interin si një ekip shumë të fortë, por shprehu bindjen se francezët i kanë kartat në rregull për të shkruar historinë, duke qenë se nuk e kanë fituar asnjëherë këtë trofe të madh.
Tek parizienët dilema e vetme është në sulm, Barkola apo Due, ndërsa Dembele dhe Kvaratskhelia janë titullarë. Finalja e sotme gjykohet nga rumuni Istvan Kovaç dhe transmetohet në orën 21:00 në Vizion Plus./vizionplus.tv
