Vdekja tragjike e një fëmijë 3 vjeç ditën e premte në një kopsht në Fier i ka tronditur të gjithë.
Familjarët e të miturit shprehen se ende nuk i dinë rrethanat e ngjarjes, pavarësisht njoftimit të uniformave blu se fëmija u mbyt aksidentalisht me kapuçin e xhupit, që kishte ngecur në varësen e rrobave.
Gazetarja Laureta Roshi, teksa fliste në emisionin “Vizion i Pasdites” rreth kësaj ngjarjeje, u shpreh se gjyshërit e të ndjerit pretendojnë se janë bërë përpjekje që kjo ngjarje të mbulohet.
“Kanë reaguar gjyshërit duke dhënë një të dhënë shumë interesante, mbi efektin e përpjekjeve që është bërë për të mbuluar aksidentin. Gjyshërit dhe familjarët janë njoftuar ditën e djeshme nga sipërmarrësit e kopshtit privat për të parë mjedisin ku fëmija humbi jetën, për të parë që besueshmëria për informacion paraprak të dhënë nuk ishte besueshmëri e mirë dhe gjyshja ka insistuar në vendin ku ndodhi aksidenti. Nuk kishte shirita policie. Kërkoi llogari për rrethanat dhe kamerat për të parë të vërtetën se si ka ndodhur ky aksident tragjik.”
