Deputeti i Partisë Socialiste, Etjen Xhafaj, në një intervistë për Vizion Plus ka folur lidhur me fitoren në Rrogozhinë dhe motiven e këtij rezultati të thellë.
Një fitore e thellë ndaj kandidatit të “Bashkë Fitojmë”, ndërsa Berisha e konsideron si vjedhje të zgjedhjeve. Si shpjegohet ky “lum” votash për PS në vetëm dy muaj kohë?
“Ishte për t’u pritur që nga opozita zgjedhjet e 23 korrikut do të atakoheshin, siç është bërë fundja me çdo proces tjetër zgjedhor, që ka ndodhur dhe janë zhvilluar vitet e fundit, sepse kjo ka qenë retorika. Të gjitha zgjedhjen që nuk janë fituar nga opozita aktuale janë kontestuar dhe sulmuar. Ka një shpjegim shumë të thjeshtë, që nuk është aspak i vështirë që të shikohet edhe nga kolegët e opozitës. Pasi Rrogozhina në 2 vitet e fundit, duke filluar që nga viti 2021 deri më 23 korrik, procesi i fundit zgjedhor, pra ka pasur 4 procese zgjedhore gjatë të cilave kemi qenë vazhdimisht në një ushtrim konstant organizimi, riorganizimi, komunikimi mes njerëzve”, thotë ai duke theksuar se pas 6 Marsit janë bërë disa gabime strategjike që solli dhe rezultatin e 14 majit, por të kjo u korigjua sipas tij në fushatën e 23 korrikut.
Për çfarë është dhe ishte i rëndësishëm procesi zgjedhor në një qytet si Rrogozhina?
“Unë besoj që është proces shumë i rëndësishëm në nivel të pushtetit lokal, pavarësisht se bashkitë e vogla nuk kanë mundësinë për të hyrë në investime publike në zona për të bërë të gjithë ato punë që duhen bërë, përsëri janë shumë të rëndësishme në komunikimin e drejtëpërdrejtë me njerëzit, për të komunikuar dhe zgjidhur problematikat e vogla, prandaj ishte dhe ky rezultat”, thekson ai duke shtuar se meritat i takojnë edhe kandidatit, i cili sipas tij jeton e vepron në Rrogozhinë.
PS ndodhet përpara Kuvendit Kombëtar ndërkohë ndodhet në vorbullën ku disa eksponentë të saj janë para drejtësisë, çfarë duhet të presë publiku nga ky Kuvend?
“Së pari ne duhet duhet të bëjmë një analizë pas procesit zgjedhor të 14 majit dhe përfundimin e realitetin e tij. Sigurisht, jemi në mesin e mandatit të tretë dhe ka nevojë për një rikalibrim të atyre që janë objektivat. PS e ka bërë në vazhdimësi këtë proces, rifreskimi të ideve, rishikim nga vetja, për të bërë një analizë se çfarë do të ndodhë në të ardhmen. Kjo Asamble Kombëtar do të fillojë si nisje nga analiza elektorale zgjedhore e 14 majit, për të parë ato që janë sfidat në vitet në vijim dhe nevojat për të qenë gjithmonë në një revolucion konstant për të komunikuar më mirë e më afër me qytetarët”, tha ai.
