Dhjetëra pronarë biznesesh përgjatë zonës turistike të Lungomares janë mbledhur sot në një protestë kundër aksionit të ndërmarrë për lirimin e hapësirave publike. Sipas tyre, ky aksion është i papërshtatshëm për momentin, pasi ndodh në kulmin e sezonit turistik, kur aktiviteti i tyre arrin pikun dhe të ardhurat janë jetike për mbijetesën e bizneseve të vogla dhe të mesme.
Protestuesit kërkojnë ndërhyrjen e menjëhershme të kryeministrit për pezullimin e këtij vendimi deri në përfundim të sezonit veror. Ata theksojnë se shumë prej ndërhyrjeve përfshijnë heqjen e tavolinave dhe strukturave të përkohshme të vendosura në trotuare apo hapësira të tjera publike, që përdoren për shërbim ndaj klientëve në lokale, bare dhe restorante.
Lexo edhe :
Related Posts
Disa prej bizneseve kanë paralajmëruar mbylljen e aktivitetit në shenjë proteste, nëse nuk merren masa për të ndalur përkohësisht zbatimin e vendimit.
Nga ana tjetër, autoritetet shtetërore argumentojnë se ky aksion ka për qëllim lirimin dhe sistemimin e hapësirave publike të zaptuara në mënyrë të paligjshme, për të garantuar qarkullim të lirë për qytetarët dhe një pamje më të rregullt të zonës turistike. Megjithatë, koha dhe mënyra e zbatimit të këtij vendimi ka ngjallur debat dhe pakënaqësi të gjerë mes sipërmarrësve lokalë.
