Partia Demokratike dhe Partia e Lirisë janë të vendosura të zhvillojnë protestën e tyre në 6 dhjetor, ditë kur në Tiranë do të mbahet samiti BE-Ballkani Perëndimor, edhe pse Policia e Shtetit nuk ja u aprovoi lejen.
Anëtari i Kryesisë së PD Arben Ristani në një intervistë për Vizion Plus tha se ligji nuk e parashikon që autoritetet të japin leje për tubime, por këto të fundit duhet të jenë në dijeni nga subjektet politike.
“Askund në ligj nuk parashikohet që autoritetet të japin leje për tubime. Nuk kemi ku të marrim leje, kështu që mitingu parapërcaktohet e për këtë njoftohen organet e sigurisë”.
Por duket se opozita nuk ka marrë parasysh as propozimin e Bashkisë së Tiranës për organizimin e tubimit në sheshin Skënderbej.
Për këtë, Ristani tha se janë organizatorët ata që përcaktojnë vendin dhe kohën, si dhe nëse marrin në konsideratë sugjerimet e institucioneve apo jo.
“Për tubimet, organizatorët përcaktojnë vendin, kohë, duke u dhënë mundësinë vendeve kompetente dhe i njoftojnë. Në rast se Bashkia e Tiranës ka një mendim tjetër, është diccka që po të duan organizatorët i marrin parasysh, po të duan nuk i marrin. Vendi dhe ora e tubimit është përcaktuar”.
Referuar vulës së PD e cila është në gjykatë, Ristani tha se ajo po mbahet peng nga Rama përmes gjyqësorit.
Por për anëtarin e Kryesisë, janë demokratët ata që kanë vendosur se kush do e drejtojë partinë.
“Nuk mund të jetë gjykata, aq më tepër kryeministri të përcaktojë se kush e mban vulën. Është gjëja më e rëndë që po ndoddh sepse kryeministri përmes gjyqësorit po dikton ku duhet të shkojë vula në një parti. Për ne është një nga shkaqet e shtuara për një revoltë për shkak të cënimit të demokracisë. Demokratët e kanë vendosur se kush do i përfaqësojë. Shërbëtorët e Ramës do e bëjnë të tyre për sa kohë do kenë mundësinë ta bëjnë”.
