Në kuadër të protestës së kamionistëve, ka nisur takimi i ministrave të Transporteve të Maqedonisë së Veriut, Serbisë, Malit të Zi dhe Bosnjë-Hercegovinës me përfaqësues të Bashkimit Europian, i cili po zhvillohet në Bruksel.
Sipas të dhënave nga organizatorët e protestës, takimi ka për qëllim diskutimin e kërkesave të kamionistëve dhe bizneseve të transportit, të cilat lidhen me zgjatjen e afatit të qëndrimit në zonën Schengen.
Kamionistët kërkojnë që kufiri maksimal i qëndrimit të zgjatet nga 90 në 180 ditë, duke e konsideruar kufizimin aktual si pengesë serioze për zhvillimin e aktivitetit të tyre ekonomik.
Në përfundim të takimit pritet të bëhet e ditur nëse është arritur ndonjë dakordësi mes palëve.
Ndërkohë, prej tre ditësh, pikat kufitare mes Maqedonisë së Veriut, Serbisë, Bosnjë-Hercegovinës dhe Malit të Zi vijojnë të jenë të bllokuara për qarkullimin e kamionëve me mallra, si pasojë e protestës.
/vizionplus.tv
