Presidentja e Republikës së Kosovës, Vjosa Osmani ka deklaruar se Kosova nuk kundërshton zbatimin e detyrimeve të saj por kërkon që marrëveshja e Ohrit të zbatohet nga te dyja palët.
“Në këtë kontekst, marrëveshja nuk ka vetëm nenin e Asociacionit, ka edhe nenet e tjera, të cilat, ndër të tjera, kërkojnë nga Serbia që të njohë sovranitetin e Kosovës, integritetin territorial, që mos të përdorë dhunën si mjet, apo forcën si mjet për raporte ndërshtetërore dhe kërkon në Nenin 4 që të mos krijojë pengesa, apo mos të kundërshtojë anëtarësimin e Kosovës në organizatat ndërkombëtare. Pra, e vetmja që Kosova po kërkon është që marrëveshja të zbatohet në tërësi e jo vetëm nga njëra palë të kërkohet zbatim i plotë, kurse nga ana tjetër mos të kërkohet zbatimi i asnjërës prej dispozitave”, tha Osmani.
Pas përballjes në Këshillin e Sigurimit me homologun serb Aleksandër Vuçiç, Osmani tha se Kosova do t’i drejtohet Gjykatës Kushtetuese për statutin e Asociacionit pasi të jetë arritur një marrëveshje për zbatimin e akteve që dalin nga marrëveshja e nënshkruar në Ohër nga Kosova dhe Serbia.
“Natyrshëm që një hap i tillë duhet të bëhej në qoftë se ka plan sekuencimi dhe në qoftë se edhe Serbia zbaton në të njëjtën kohë dhe si alternativë në qoftë se bashkësia ndërkombëtare i ofron Kosovës anëtarësim në organizata të cilat janë të domosdoshme për ecjen euro-atlantike të vendit tonë dhe për sigurinë e vendit tonë, sepse në fakt sfida më e madhe me të cilën ne përballemi është sfida e sigurisë, të cilën e krijon Serbia dhe pastaj kjo sfidë krijon shumë të tjera, qoftë në aspektin ekonomik apo të investimeve të jashtme dhe shumë të tjera”, tha Osmani.
Për sa i përket bojkotimit të zgjedhjeve nga serbët në veri të Kosovës shprehu shqetësimin e saj ndërsa akuzoi për këtë presidentin serb Aleksandër Vuçiç./vizionplus.tv
