Presidenti i Malit të Zi, Milo Gjukanoviç ka deklaruar se Partia Demokratike e Socialistëve të cilën ai e kryeson, do të mbështesë qeverinë e pakicave, pasi koalicioni qeverisës duhet të distancohet nga varësia ndaj nacionalizmit serbomadh.
MILLO GJUKANOVIC
PRESIDENT, MALI I ZI
“Ne do të mbështesim çdo qeveri që do të ruajë karakterin qytetar dhe laik të Malit të Zi, do të promovojë demokracinë multietnike dhe do të kontribuojë në zhvillimin dinamik ekonomik, në mënyrë që Mali i Zi, si një vend i zhvilluar demokratikisht dhe ekonomikisht, të jetë pjesë e Bashkimit Evropian në të ardhmen e afërt. Vendi tani është në proces të konsolidimit të pushtetit dhe duhet që sa më shpejt të ketë një qeveri të përgjegjshme.”
Megjithatë, Gjukanoviç thekson qëndrimin për të mos u bërë pjesë e qeverisë së re.
“Ne jemi të gatshëm ta mbështesim një qeveri të tillë, por nuk do të marrim pjesë në të. Padyshim që u deshën 14 muaj përvojë të pasuksesshme si kjo për t’u kthyer tek propozimi ynë fillestar. Mendoj se falë nesh, falë opozitës shtetformuese, Mali i Zi arriti t’i rezistojë ofensivës së Beogradit, u duk sikur fitorja e të preferuarve të tyre në zgjedhjet e 30 gushtit, hapi derën për një aneksim të ri të Malit të Zi, këtë herë përmes projektit ‘Bota Serbe’.”
Ndërkohë, tre ditë pas rrëzimit me mocion mosbesimi të Qeverisë së Malit të Zi, Kuvendi është mbledhur në një seancë të jashtëzakonshme për shkarkimin e kryetarit të këtij institucioni, Aleksa Beçiç.
Nismën për shkarkimin e tij e kanë nënshkruar 38 deputetë të opozitës nga Partia Demokratike e Socialistëve, dy parti të socialdemokratëve, Partia Boshnjake dhe nga Koalicioni Shqiptar “Njëzëri”. Për largimin e kryetarit të kuvendit do të duhen të paktën 41 vota.
