Katër ditë para se të skadojë afati për regjistrimin e koalicioneve, ende nuk ka një marrëveshje mes kryetarit të PD Lulzim Basha dhe aleatit historic, kryerepublikanit Fatmir Mediu. Pas një takimi që zgjati më shumë se një orë, Mediu deklaroi se ende po diskutohen detajet e bashkëpunimit mes dy forcave politike, shkruan “Vizion Plus”.
“Ka një analizë të thjeshtë se sa mandate i takojnë PD dhe PR. Ajo që dua të them pavarësisht se kush është emri i personit, PR do jetë kontributore për të marrë vota në Kukës dhe Dibër dhe në zona të tjera që s’kemi pretendime për kandidatë. Programi i PD është i plotë dhe meqë flasim për bashkëpunim politik, ky program duhet të përfshijë dhe idetë e partive të tjera. Secila parti ka specifika. Opozita të maksimalizojë sa më shumë votat. Do të garojmë në një koalicion të përbashkët me PD. E rëndësishme është njëlloj zgjimi i qytetarëve shqiptarë. Janë të rëndësishme votat e PR dhe të aleatëve.”
E ndërsa bisedimet me republikanët vazhdojnë, Basha ka mbyllur marrëveshjen me kreun e PDIU Shpëtim Idrizi, të cilin e takoi paradite dhe Agron Duken e PAA.
