Prej 1 janarit, Portugalia ka marrë Presidencën e BE-së, një kryesim që vjen në mes të krizës së Covid-19 dhe në kohën kur beteja për vaksinën është kthyer në kryefjalën e çdo diskutimi.
Video e shpërndarë nga Ministria e Jashtme e Gjermanisë, e cila ja kalon stafetën tashme Lisbonës, është dëshmia më e qartë se fokusi i BE-së, është tek lufta ndaj pandemisë, ndërsa zgjerimi është lënë në hije.
Në fjalën e tij, Kryeministri i Portugalisë, Antonio Costa renditi tre prioritetet e 6 muajve të ardhshëm.
“ANTONIO COSTA
KRYEMINISTER I PORTUGALISE
Rimëkëmbja ekonomike dhe sociale përmes transformimit klimatik dhe digjital. Zhvillimi i Shtyllës Sociale të Bashkimit Evropian si një bazë e besimit që na lejon të udhëheqim tranzicionet dixhitale dhe klimatike pa lënë askënd pas Përforcimi i autonomisë strategjike të një Bashkimi Evropian të hapur për botën.”
Edhe pse Shqipëria tashmë prej kohësh pret një datë për tryezën e parë ndërqeveritare me Bashkimin Europian, ky i fundit nuk e ka në prioritetet e tij këtë çështje.
Ndonëse marsi është një afat në të cilin pritet një drite jeshile për Shqipërinë dhe Maqedoninë e Veriut, situata e Covid-19 mund të ndikojë që kjo pritshmëri të shtyhet. E ndoshta do të jetë presidenca e një vendi Ballkanik, Sllovenisë, periudha në të cilën Tirana dhe Shkupi mund të marrin një datë përfundimtare.
