Një grup kongresmenësh republikanë në Shtetet e Bashkuara të Amerikës kanë gjetur përkrahjen e disa politikanëve të mbështetur nga Rusia në Europën Lindore, veçanërisht në Ballkan, për një qëllim të përbashkët: Të luftojnë multi-miliarderin Xhorxh Soros.
Në një analizë të saj, prestigjiozja “Politico”, shkruan se ata kanë firmosur një dokument, në thelb të të cilit qëndron hetimi i qëllimeve të Soros për të imponuar idetë e tij në Ballkan. Këtë Soros sipas tyre, po e arrin duke përdorur projektet dhe financimet e tij. Kjo është një akuze qe po nxitet dhe mbështetet nga Moska.
Kremlini i sheh fondet e tij për grupet e shoqërisë civile në ish-shtetet satelite sovjetike, si pjesë e një komploti për të vendosur në to qeveritë properëndimore, por këto ankesa prej vitesh kanë rënë në vesh të shurdhët në Uashington. Letra e ligjvënësve e dërguar më 14 mars Sekretarit Amerikan të Shtetit , Rex Tillerson, ngre alarmin se “Fondacioni për Shoqëri të Hapur” i Xhorxh Soros po përpiqet të çojë më tej axhendën dhe të forcojë partitë politike të të majtës.
Fokusi i kësaj letre ka në qendër shpenzimet e fondacionit të Soros veçanërisht në Maqedoni, një vend i përfshirë në një krizë 2-3 vjeçare politike, dhe më pak në Shqipëri. Në Tiranë, citon “Politico” letrën e kongresmeneve, organizatat e mbështetura nga Soros po përpiqen të mbështesin reformat që kanë për qëllim t’i japin kryeministrit të majtë kontrollin e plotë të sistemit të drejtësisë.
Në te i kërkohet Departamentit të Shtetit të hetojë veprimtarinë e Soros dhe të diplomacisë amerikanë në Maqedoni vitet e fundit. Pas zgjedhjeve të 11 dhjetorit, ish-kryeministri Gruevski akuzoi Xhorxh Soros për këtë krizë, ndërsa bëri thirrje për desoroizimin e politikës në Maqedoni. Ndonëse partia e tij VMRO-DPMNE është pro-europiane, Gruevski ka mirëpritur mbështetjen e Rusisë për situatën aktuale, ndërsa pozicioni i SHBA-së përkon më shumë me të majtën e Zaev. Analistët e intervistuar nga “Politico” evidentojnë se strategjia e Gruevskit është për të afruar dhe mbajtur Rusinë në anën e tij.
Në shkrim theksohet se lufta anti-Soros po bëhet edhe në vende të tjera, si në Hungari. Lideri i djathtë pro-rus, Viktor Orban ka shënjestruar vazhdimisht Xhorxh Soros, duke thënë se po përpiqet që në mënyrë sekrete dhe me shumë fonde të indikojë në politikën hungareze.
