Në kontrollet më të fundit të realizuara nga policia e Tiranës janë gjobitur dhjetëra shoferë. Ndryshe nga herët e shkuara, së fundmi janë organizuar pika kontrolli lëvizëse në të gjithë territorin e kryeqytetit, me agjent verifikues me veshje civile të cilët vëzhguan dhe regjistruan me aparate fotografikë në orë të ndryshme të ditës dhe të natës.
Nga kontrollet e ushtruara u konstatuan dhe u ndëshkuan, 95 drejtues mjetesh për përdorim celulari, 78 drejtues motomjetesh për mospërdorim të kaskës mbrojtëse, 35 drejtues për mosdhënie përparësie ndaj këmbësorëve.
Ndërsa 8 drejtuesve u është pezulluar leja e drejtimit për drejtim mjeti nën ndikimin e alkoolit, 15 drejtues mjetesh për gara me shpejtësi kryesisht në zonën e unazës së madhe, 120 mjete të ndaluara administrativisht pasi rezultonin debitor si dhe u vendosën 790 masa administrative për shkelje të tjera të rregullave të qarkullimit rrugor.
Gjithashtu përgjatë 24 orëve të fundit në funksion të këtyre kontrolleve janë arrestuar në kushtet e flagrancës 14 drejtues mjetesh, nga nën akuzën e shkeljes së rregullave të qarkullimit, përdorimit të makinës pa patent dhe drejtues të cilët ishin nën efektin e alkoolit.
