Përshkallëzohen tensionet në kufirin mes Greqisë dhe Turqisë. Policia e vendit fqinj ka hedhur gaz lotësjellës ndaj qindra refugjatëve në Evros të cilët kërkojnë të hyjnë në territorin grek.
Përveç forcave të shtuara tokësore në kufi, duket se autoritetet greke po përdorin dhunë për të larguar refugjatët me dhunë edhe në det.
Kjo video e publikuar nga mediat, tregon momentin kur një anije e forcave detare greke në ujerat e Egjeut, qëllon ndaj gomones me refugjatë duke i rrezikuar ata të mbyten.
Për pasojë, një refugjat dyshohet se ka vdekur, ndërsa 5 të tjerë janë plagosur.
Tensionet janë shtuar këtë të mërkurë edhe në kufinjtë tokësorë, kryesisht në rajonin verilindor të Evros, ku sipas mediave greke janë më shumë se 12 mijë refugjatë që presin të kalojnë kufirin. Ata madje kanë tentuar të shkaterrojnë telat me gjemba në kufi, por janë përballur me forcat e shtuara greke e cila është kundërpërgjigjur.
Përleshjet mes policisë greke dhe refugjatëve kanë nisur që të premten e kaluar, që kur presidenti turk Rexhep Tajip Erdogan paralajmëroi hapjen e kufinjve për të gjithë refugjatët që kërkojnë të shkojnë në vendet e Bashkimit Europian.
Këtë të mërkurë, ministrat e Brendshëm të BE-së do të mblidhen në Bruksel ku do të diskutojnë për marrjen e të gjitha masave të nevojshme për të parandaluar kalimet e paligjshme në kufinjtë e jashtëm të bllokut.
Takimi i tyre vjen vetëm një ditë pasi zyrtarët e lartë të unionit monitoruan nga afër situatën në Evros.
Ndërkohë Presidenti i Këshillit Europian Charles Michel është takuar në Ankara me presidentin Turk Erdogan për krizën me refugjatët.
Vendimi i Turqisë për të hapur kufinjtë e saj për emigrantët erdhi pas një sulmi të qeverisë siriane të mbështetur nga Rusia në Idlib të Sirisë, ku mbetën të vrarë 33 ushtarë turq.
Por Athina zyrtare thekson se hapja e kufinjve është një përpjekje e Erdogan për të arritur qëllimet e tij gjeostrategjike.
