Një efektiv policie ka kallëzuar penalisht kryebashkiakun e Lezhës, Pjerin Ndreu me pretendimin se nuk lejoi Patrullën e Përgjithshme të kryente detyrën. Lidhur me këtë, ka reaguar Partia Demokratike, përmes Sekretarit të Përgjithshëm, Gamzent Bardhi.
Në një postim në “Facebook”, Bardhi shkruan se Ndreu duhet të ishte në burg për “vjedhjen e zgjedhjeve”.
“Pjerin Ndreu nuk duhet të jetë mbi ligjin, Pjerin Ndreu duhet jetë në burg sepse është i njëjti që në Dosjen 184 “fluturonte” mësuesit nga puna me urdhër partie dhe sot sulmon dhe fyen policinë. Deliri tij është produkt i paligjshmërisë mbi të cilën ngrihet pushteti i korruptuar i regjimit Rama-Doshi: Vjedhja e zgjedhjeve! Ata nuk përfaqësojnë qytetarët, por interesat e krimit me të cilin masakrojnë zgjedhjet dhe vjedhin vullnetin e shumicës për ndryshim. Që arroganca ndaj qytetarëve dhe institucioneve të ndalojë, që ankthi dhe pasiguria të mos mbretërojnë në familjet shqiptare, duhet marrë fund modeli i politikës të lidhur me krimin.”
Lidhur me kallëzimin, reagoi dhe kryebashkiaku i Lezhës, i cili nuk i kurseu sulment ndaj policisë. Sipas tij, efektivët ndërhynë me veprime te dhunshme, në një darkë zyrtare të bashkisë ku ishin të pranishëm 15 kryetarë të komunave të kosovës. Ndërsa përdor një gjuhë fyese ndaj policëve, Ndreu pranon se e kishin tejkaluar orën policore, ndërsa akuzon policët se kanë lejuar lokale të tjera në qytet.
