Në procesin për dosjen “Plumbi Artë” po dëshmon Erion Alibej, një tjetër i penduar, bashkëpunëtor i drejtësisë.
Në dëshminë e tij, Erjon Alibej, i dyshuar për një sërë ngjarjesh kriminale, ka pranuar përfshirjen e tij në vrasje me pagesë dhe ka dhënë detaje të qarta për bashkëpunimet me emra të njohur të botës së krimit.
Gjatë deklarimeve për njohjen me Nuredin Dumanin, një tjetër figurë qendrore në dosjet e grupeve kriminale shqiptare, Alibej tha:
“Nuk e njihja më parë, por ai më tha që kishte qenë me Dorjan Shkozën dhe se ai kishte gjuajtur nga ana tjetër. Unë nuk kam lidhje me ata, kam problemet e mia. Nuk më interesojnë, unë jam vrasës me pagesë. Problemin tim e kisha me Talo Çelën. Ai është i vetmi që më intereson.”
Alibej shtoi se kërkonte të hakmerrej për vrasjen e vëllait të tij dhe e akuzon për këtë ngjarje grupin e vëllezërve Çopja, si dhe Mikel Kamamin.
“I thashë që dua edhe vëllezërit Çopja, se e dija që ishin porositës të vrasjes së vëllait tim dhe Mikel Kamami. Ai më tha ‘i bëjmë të gjitha’.”
Ai rrëfeu gjithashtu se kishte rregulla të qarta për mënyrën e pagesës për vrasje: gjysma e shumës paraprakisht. Duke folur për komunikimet, Alibej tregoi se ishte i pajisur me mjete të sofistikuara për të shmangur përgjimet.
“E pyeta çfarë do nga unë. Unë për çdo vrasje marr gjysmën e lekëve përpara. E pashë që nuk kishte telefon të enkriptuar. I thashë Arjanit: ky s’paska telefon të enkriptuar. Unë mbaja dhe telefona të tjerë. Kisha përshtatur një iPhone 6 me aplikacionin SKY dhe e pajisa me të.”
/vizionplus.tv
