“Koreja e Veriut do ta mbështesë Rusinë derisa ajo të arrijë fitore në luftën në Ukrainë”. Kështu u shpreh ministrja e Jashtme koreanoveriore, këtë të premte gjatë një takimi me homologun e saj rus në Moskë, Sergei Lavrov.
Gjatë diskutimeve ajo e vuri theksin tek bashkëepunimi mes dy vendeve
“Marrëdhëniet tona tradicionale dhe historike sot po rriten në një shkallë të re marrëdhëniesh te miqësisë së pamposhtur ushtarake. Pheniani nuk ka asnjë dyshim se ushtria dhe populli rus, nën udhëheqjen e mençur të Putinit, do të arrijnë fitore të madhe në luftën e tyre të shenjtë për t’i mbrojtur të drejtat sovrane dhe interesat e sigurisë së shtetit të tyre. Dhe, ne gjithashtu garantojmë se deri në ditën e fitores, në do të qëndrojmë fuqishëm përkrah partnerëve tanë rusë”, tha Choe Son Hui.
“Ne u jemi thellësisht mirënjohës miqve tanë koreanë për qëndrimin e tyre parimor në lidhje me ngjarjet që po zhvillohen në Ukrainë si pasojë e synimeve të Perëndimit për ta zgjeruar NATO-n në lindje dhe për ta nxitur haptazi regjimin racist për shfarosjen e çdo gjëje që është ruse”, tha Lavrov.
Asnjëri prej tyre nuk foli për deklaratat e Shteteve të Bashkuara, NATO-s, Koresë së Jugut dhe Ukrainës gjatë kësaj jave, se Pheniani ka dërguar rreth 10.000 trupa në Rusi.
Sekretari amerikan i Shtetit, Antony Blinken, tha të enjten se 8.000 trupa koreanoveriore janë në rajonin Kursk të Rusisë, ku trupat ukrainase kryen një inkursion në gusht dhe prej atëherë mbajnë nën kontroll qindra kilometra katror territor. Por Putin i cili ka nisur luftën në Ukrainë që në shkurt te vitit 2022 nuk e ka pranuar e as mohuar publikisht se Koreja e Veriut ka derguar ushtare per te luftuar krah ruseve. /vizionplus.tv
