Në reagimin e tij të radhës për pezullimin nga detyra të numrit dy të qeverisë Belinda Balluku, kryeministri Edi Rama numëroi vendimet që po presin firmën e ministres së infrastrukturës e që, për shkak të vendimit të Gjykatës së Posaçme, nuk miratohen dot.
Mes vendimesh, sipas Ramës, është edhe nisja e fluturimeve ajrore mes Shqipërisë e Kanadasë.
“Ja konkretisht nga tryeza ime e punës sot, shembujt konkretë, krejt aktualë, pse unë i kam kërkuar Gjykatës Kushtetuese heqjen e pezullimit absurd të një anëtari të qeverisë dhe pse të pezullosh një ministër (për herë të parë në botë) sjell pasoja që cënojnë konkretisht funksionimin e qeverisë dhe interesin publik: Kanë përfunduar diskutimet në nivel teknik dhe kthimpërgjigja pozitive e palës kanadeze, i ka hapur rrugë lidhjes së marrëveshjes dypalëshe mes Shqipërisë dhe Kanadasë për nisjen e fluturimeve ajrore transoqeanike midis dy vendeve. Mirëpo kjo procedurë, aktualisht nuk mund të vijojë me hapat e mëtejshme të miratimit e të nëshkrimit të saj, pasi autoritetin ekskluziv për këto hapa, Kushtetuta ia jep ministrit dhe kompetencat e vendimmarrëse të tij nuk mund të delegohen tek askush tjetër. Kështu që pezullimi ne fjalë, vendos një pikëpyetje të madhe mbi fillimin e fluturimeve në qershor 2026, sipas parashikimit”, tha Rama.
Rama shton se në pritje për firmën e Ballukut janë edhe 18 akte që lidhen me rindërtimin pas tërmetit të 2019.
“Aktualisht, ka edhe 36 akte të tjera të Ministrisë së Infrastrukturës dhe Energjisë, ku vetëm akte për rindërtimin janë 18, të cilat mbeten të pezulluara bashkë me ministrin, ndërkohë që çdo ditë që pezullimi i ministrit zgjatet, zgjatet edhe lista e punëve të bllokuara”, u shpreh kryeministri.
Rasti i Belinda Ballukut është në Gjykatën Kushtetuese. Qeveria kërkon prej saj një vendim nëse gjyqësori mund të ndërhyjë në punët e ekzekutivit duke pezulluar ministra.
Mbledhja e Gjyqtarëve ishte e planifikuar për të enjten, por gjykata kushtetuese, në një njoftim zyrtar, sqaroi se, për shkak të kompleksitetit të çështjes, volumit të materialeve dhe axhendës, seanca do të mbahet në datën 12 dhjetor.
