Projekti “Historia e shqiptarëve” ka bërë bashkë 15 historianë, arkeologë dhe studiues nga Shqipëria dhe Kosova, të cilët kanë nisur punën për hartimin e saj në dy vëllime.
I ftuar në “Spotlight” nga Alban Dudushi, në “Vizion Plus”, historiani Erald Kapri e ka cilësuar modelin e prezantuar nga Akademia e Shkencave si sovjetik. Kapri shprehet se ky model, për të, është i tejkaluar.
Nga ana tjetër, historiani Pëllumb Xhufi shprehet se historianët vënë faqen në këtë punim.
Pjesë nga biseda në studio:
Erald Kapri: Në momentin që Akademia mban autorësinë, ky është një model i tejkaluar dhe madje i ngjan një modeli sovjetik. Nuk e ka asnjë vend perëndimor. Maksimumi thuhet që ‘filan’ autor i studimit është financuar ose mbështetur nga Akademia, por kurrë Akademia ose një institucion publik të mbajë përgjegjësinë për një punim shkencor. Ky është model i tejkaluar…
Pëllumb Xhufi: Këtu duhet të kesh një gjë parasysh, që historianët vënë faqen. Ne, prandaj i kemi zgjedhur historianë që kanë shkruar jo vetëm një libër, por disa libra për atë periudhë të caktuar.
