19-vjeçari Jehon Breçani i cili aksidentoi mbrëmjen e të enjtes një kalimtare të rastit në rrugën “Xhanfize Keko”, është arrestuar nga blutë e kryeqytetit.
Mësohet se vajza 23-vjeçare Xhesina Gega ndodhet në gjendje të rënduar shëndetësore në rrezik për jetën dhe po mbahet nën mbikëqyrjen e mjekeve në Spitalin Universitar të Traumës. E reja humbi njërën këmbë nga përplasja e automjetit tip “Benz”.
Drejtuesi i mjetit është djali i ish-drejtuesit të lartë të policisë së Tiranës, Erzen Breçani.
Sipas qytetarëve që ishin të pranishëm në momentin e aksidentit, vajza ishte duke ecur në trotuar kur është goditur nga makina.
Policia në vendin e ngjarjes bëri ekspertizën, ndërsa hetimet paraprake tregojnë se aksidenti erdhi si pasojë e humbjes se kontrollit të automjetit për shkak të shpejtësisë së lartë.
Shërbimet e policisë kryen dhe testin e alkoolit për drejtuesin e mjetit, i cili ka rezultuar pa problem.