Shërbimi i Inteligjencës së Jashtme të Rusisë (SVR) akuzoi të enjten industrinë e mbrojtjes të Serbisë se ka furnizuar me armë Ukrainën, pavarësisht neutralitetit zyrtar të Beogradit në luftë.
Të paktën shtatë kompani kryesore serbe të mbrojtjes kanë dërguar qindra mijëra raketa dhe miliona fishekë armësh të vogla në Ukrainë duke përdorur certifikata “të rreme”, pretendoi SVR në një deklaratë në faqen e saj të internetit, raporton The Moscow Times.
“Këto dërgesa vështirë se mund të justifikohen për ‘arsye humanitare’. Qëllimi i tyre i vetëm i dukshëm është të vrasin dhe gjymtojnë ushtarakët dhe civilët rusë”, tha SVR, duke i quajtur transferimet e dyshuara “një përpjekje për t’i ngulur thikën Rusisë pas shpine”.
Serbia eksportoi municione me vlerë 800 milionë euro (908 milionë dollarë) në Ukrainë nëpërmjet vendeve të treta që kur Rusia nisi pushtimin e saj në shkallë të plotë në vitin 2022, raportoi Financial Times verën e kaluar.
Presidenti serb Aleksandër Vuçiç, i cili vizitoi Moskën këtë muaj për paradën ushtarake vjetore të Ditës së Fitores në Rusi, i ka mbrojtur eksportet si transaksione ligjore të kryera përmes ndërmjetësve si Shtetet e Bashkuara, Spanja dhe Republika Çeke.
“Ne kemi miq në Kiev dhe në Moskë. Këta janë vëllezërit tanë sllavë”, tha Vuçiç për FT. “Duhet të kujdesem për popullin tim dhe kaq”.
Serbia mban lidhje të ngushta me Moskën dhe varet shumë nga gazi rus. Edhe pse është kandidate për anëtarësim në BE, ajo nuk i është bashkuar sanksioneve perëndimore kundër Rusisë për shkak të luftës në Ukrainë.
Dhjetëra mijëra rusë janë zhvendosur në Serbi që nga pushtimi i shkurtit 2022./vizionplus.tv
