Gazetari Flogert Muça, i ftuar në Quo Vadis të moderatores Pranvera Borakaj në Vizion Plus, ka analizuar përballjen mes SPAK-ut dhe politikës, si edhe atë që po shihet në publik.
Sipas Muçës, deri më sot denigrimet publike të çdo lloj politikani nuk kanë asnjë interes publik.
Muça tha se përgjimet që publikohen sot në media mund të shërbejnë vetëm si konsum politik, por nuk kanë asnjë interes publik, pasi interesi i vërtetë është të dihet se ku shkojnë milionat e vjedhura.
“E rëndësishme është të bëhet drejtësi, jo të dalin përgjime. Tek ne bëhen denigrime publike, dalin gjëra të parëndësishme për këdo, dhe nuk ka rëndësi nëse bëhet drejtësi apo nëse gjenden paratë. Ku janë 90 milionë euro? Këto të na tregojë SPAK, jo të më tregojë fotot e Ervisit berber. Për Veliajn mos më tregoni brekët e Ajolës, por paratë. Kur flitet për miliarda të keqmenaxhuara, shohim citatet e SPAK-ut që nuk korrespondojnë fare. Para disa ditësh pata një bisedë me një mik që mbronte SPAK-un dhe i thashë: ‘Ore, më trego rezultatet’. Më thotë: ‘Ka konfiskuar 200 mijë euro’. Ne nuk na duhen fare përgjimet, sepse në përgjime ka akuza që komprometojnë opozitën; ajo gjë nuk ka interes publik, ka interes politik”, tha Muça.
